U Symbood Montri Rangbah ka jylla uwa man leh u Chiarman ka High Level Committee wow kyrriah ya ki bru na Them Metor (Them Ïewmawlong), u Prestone Tynsong da ong u wa ka sorkar daw pyrkhat ko kiyi ki laad wei cheiwon u kyrriah ya ki bru na itai i thaw, wei ya kattæ da hukum u ya ka chnat Pynroi Sor (Urban Affairs) wow thooh chooh ya ki thaw wa ye u lai booh ya kini ki bru.
Da ong u wa ka sorkar kwah ko u yakrehlang wa ki kamjooh wa waroh ki Dorbar Chnong, khamtam wa ka Dorbar Chnong Mawbah kawa da pynsñiaw khia hajrong i thmu wow kyrriah ya ki cha kani ka chnong.
Yeini u Symbood Montri Rangbah da klam u hadien i pyrchah na ka Dorbar Chnong Mawbah wa u MLA, kiwa da lai e kti ya ka dorkhat ha ka sorkar wa toh u pyrkhat biang ko deiwi tawon hajrong ini i thmu.
U Prestone da ong u leh wa lada katni u kyrriah ya ki bru na Them Metor, ka sorkar ym kwah won ko u jia iwon iwon næ wow mih i awri awra.
Da pyntip u leh wa hadooh katni ka chnat pynroi sor pynyoo heh ko wa ye u booh ya ki ha i thaw ka sorkar wa em hajan ka RP Chest TB Hospital, tangwa da ong u lada sñiaw wa khynnia i thaw wow pynsah ya waroh 342 tylli ki manyung ka sorkar ym yohsa ko wow phiah ya ki næ wow kyrriah cha kiwi tawon ki thaw.
Hawa kylli, u Prestone da ong u hadooh kattæ ka sorkar ympu em yoh ko ya ka ‘Blueprint’ næ i dro dur yow chna yaka yung dalan paki ha i thaw wa heh kamwa 3 Acre ha Mawbah, wei kamwa man kattæ dang pyrchang wow thooh i thaw wa rap biang iwa toh i yong ka sorkar, wei ka Sorkar kwah ko u pynbait deiwa yahun wei biang lang yow lait nei chah ktah hadien habood.
