Ka Jaiñtia Students’ Movement (JSM) Central Body da pyntip ko wa ha ki artylli ki Public Hearing ka Star Cement kiwa da dep pynman yow tih moochuni ha chnong Brichyrnot, neiliang ka seiñ da pyrchah joor ko ya ini i thmu kani ka karkhana wow tih moochuni deilang wa kiwi ki seiñ.
Tangwa ha kani ka kynti won wow pynman ya kani ka Public Hearing haka 21 tarik uni u bnai ha pchem ka yung krehkaam u Deputy Commissioner ka East Jaiñtia Hills neibynta ka jooh ka thong ka Star Cement, ka seiñ da chim ko yaka rai wym kyrchaan næ pyrchah ya kani ka Public Hearing.
Da ong wa ki daw toh kiwa chong chnong ka Brichyrnot da sñiaw ki wa ka seiñ da man ko kam ka moochynthut ya katai ka chnong heiwa neiliang ka seiñ da lai ko wow li pait hi dei khmat ya i thaw wa thmu wow tih moochuni haka 12 tarik uni u bnai heiwa da yoh wow yaklam wa kiwa yahkhmat ka chnong heiwa da chem wa kam ka chnong Brichyrnot hi waroh kawi da kyrchaan ko yaka Star Cement wow tih ya u moochuni hapoh u pood u ang ka chnong. Chooh chooh da pyntip wa ka seiñ leh da yoh ko wow pdiang ya i ya soi ya sñiawthooh yumut kawa biang hapyrdi kini ki arliang.
Hajrong ini, neiliang ka seiñ ha i bichaar bniah, da chaniah ko ha kiwa chong chnong ka Brichyrnot wa ka thaaiñ Narpuh hi waroh kawi wow rai lada e næ ym e laad ki yaka Star Cement wow tih ya u moochuni wei katkam wa chem ka seiñ, i heh i thaw wa da e cha ka Star Cement man ko chi pawa nei heh yong i thaw wa em u moochuni hapoh ka chnong.
