U Montri Rangbah ka jylla, u Conrad Kongal Sangma hawa jubab yeiwa kylli ha ka dorbar ynne ka sngi, da klam che u wa i kyruiñ dien cha ka soskular næ Memorandum of Understanding (MoU) pynbait pood ymye de i wow man neibhah da sorjamin wei da rooid ya u pood u ang ha khappood da ka Survey of India ryngkat ki ar jylla.
Hawa jubab yeiwa kylli u MLA ka Nongpoh, u Mayralborn Syiem, u Conrad da ong u wa i kaam pynbait pood wa ka jylla Assam da poi i cha ka kylla wa ar wei i yachem wa nyngkong ki ar ngut ki Montri Rangbah da man i ha ka 21 Naisaphra 2022.
Hawa jubab chooh chooh u Conrad da ong u wa ki rai wa da chim da ka sorkar ymtoh kiwa suk, tangwa ka sorkar da lai ko chaphrang wow pynbait pood hadien wa syllok wa waroh kiwa embynta. Da ong u kiwa boon ki chnong ha i pynbait pood da yoh cha Meghalaya, katwa em ki chnong kiwa sah cha Assam wei kini toh katkam ki mon ki paidbah wa kiwa chong ha kini ki chnong.
Da ong u wa ym em ieh ya ki chnong, wei ym em hi yaklam ya ki chnong ki wym i ya kajia pood, wei ym toh iwa suk ya ka sorkar wow kynthup ya kitæ ki chnong, kamtæ da ong u wa da ieh ya kitæ ki chnong ki wym em hapoh Meghalaya wei ym ye u leh iyi iyi lada ong won ki wa kwah ki wow em katni cha Meghalaya.
Heiyatoh wa ka MoU, u Conrad da ong u wa ya i rai wa khaddooh yong i yaklam wow soi ya ka MoU da chim na kiwa boon ki bynta, deiwa bichaar leh ya ki Map wa ki thup wa da em ryngkat i pynsñiaw cha ki paidbah. Da ong u wa ymtoh wa da rai du na i e yumut yong ki Regional Committee, tangwa ki bui yong kini ki Committee leh man ki kiwa emkaam bha neibhah ye wow tip ya i kwah yong ki paidbah.
Ha iwi i liang da ong u wa ka sorkar daw em bait i yaklam wow pynbiang lada em iwon iwon iwa duna, tangwa da ong u wa ymye wow kular wow lai lait ya ka bui yong u snem 2011 wa pynbait pood.
Heijooh i por da ong u wa ka sorkar dadep rai ko ya ki Regional Committee wa thymme wow emlang da ki jooh ki dkhot, wei daw kynthup leh ya waroh ki District Council.
