Ka sorkar jylla da pynkhreh ko da ka thma pyrchah yei drug wei ym maap ko ya kiwa khian næ kiwa heh kiwa emkti ha ki kaam khayi drugs ha ka jylla. Ya kani ka thong yong ka sorkar daw wanrah wei pynsñiaw ha i klam u Lat ka jylla ha ka sngi wow sdang ka Dorbar Mang Tangka ha ka 20 tarik.
Hawa klam hadien ka yalang ki Montri, u Montri uwa man leh uwa e ktien ka sorkar MDA-2.0, u Paul Lyngdoh da ong u wa ka sorkar daw chim ko wa u drug toh uwa maa wei daw yakhun pyrchah yei khayi drugs.
Da pynsñiaw u wa hadooh katni ki drug kiwa da yoh kem ki pulit da kynjoh i cha ka T. 71 klur wei ki pulit da man kiwa da kreh khlem chong ngiah wow yakhun wei wow kynreh drug wei ym maap ya kiwa emkti la ki heh mo ki khian.
Kam wow kdaw wa i kem drug ha ka jylla ha kini ki sngi wa dep da joor bha i heiwa ynni i janmiet ka 16 tarik ki pulit ka ANTF-EKH da yoh ki wow lai kem ya 6 ngut ki bru na Lower Lachumiere kiwa emkti hei dai drugs.
Na kini da kem ya 5 tylli i khieh sabon wa em i Heroin wa khia 77.02 gms, 19 tylli ki tadong khian wa em Heroin wa khia 1.71 gms, le tylli ki thuk-thuk, 6 tylli ki Mobile Phone waka poisa T. 1,26,500.
I Heroin waroh wa da yoh kem dapoi i 78.73 gms.
