Shillong: Ka dorbar ha Khasi Hills Autonomous Distrct Council (KHADC) da mynjur ko wow pynkylla noh ya ka Khasi Social Custom of Lineage (Second Amendment) Bill, 2018, wei yeini wa wanrah u CEM ka Council, u HS Shylla heiwa waroh ki MDC wa kynthup na ka PDA da pynsñiaw ki ya i yatylli wow pynkylla noh ya kani ka aiñ.
Hawa wanrah ya kani ka Bill, u Shylla da ong u, “Neidaw wa katni boon ki baar jylla pynemkaam bakla ki ya ka Khasi Autonomous District (Khasi Social Custom of Lineage) Act 1997, neibynta wow myntoi samen da wanrah yei kulmar hei mantre ki Khasi katwa kamtæ da emkaam wow pynkylla noh ya kani ka aiñ wow khanglaad ya ki kynthai Khasi wow chongkha ki wa ki baar jylla.”
Da ong wa i pynkylla ya kani ka aiñ u man ko du ya ka Section 3 (d) wei ym kheiñ bru ri-loom (ST) de ya ki kynthai wa yoh kurim da u baar jylla wa ki khon ki.
Kani ka aiñ ym ye ko wow khang laad yei yatoh ka kynthai Khasi wa u wym toh u bru ri-loom, tangwa daw pyndooh yei tipmit ya ka kynthai kam ka bru ri-loom (ST) yong ka.
“Ka jaitbru Khasi toh kawa kheiñ kur naka kynthai wei ki baar jylla da thooh ki da ki kynthai Khasi du nei khwan myntoi samen ki yow yoh ki u mantre ya ka khyndaw ka chyiap wa ka khayi pateiñ wei kani ka chongkha khleh wa kiwi won ki jaitbru da wanrah ko yei kulmar ha ki manyung mansem,” da ong u CEM.
U Shylla da ong u leh wa kam uwa mihkhmat ha KHADC ym kwah u wow poi i por wow mih ka umsnaam hadien wa kiwi ki jaitbru da boon paaid ki wei na ini i daw ka Council da leh smat ko wow wanrah ya kani ka aiñ.
Katkam wa ong u CEM, wa ye u pynkylla pyrtuid cha ki baar jylla ya ki thaw ki bhaw deiwa chongkha wa ka kynthai Khasi da pynrap u deiwa ong wa ki aiñ kam ka Trading by Non-Tribals Regulation Act, ka Meghalaya (Benami Transactions Prohibition) (Amendment) Act, ka Meghalaya Transfer of Land (Regulation) Act ymye ki u yada ya i hok ki tre ri.
U CEM da ong u, “Kani ka Bill u man aiñ noh ko mar yoh yei soi na u Lat ka jylla wei wow pynmih leh ya ka ha ka Meghalaya Gazette.”
Discussion about this post