U President ka Meghalaya Pradesh Congress Committee (MPCC), u Vincent H Pala da ong u wa ym man iwa bha wow lai leh kaam saiñpyrthai yei yakhih ha NEHU.
Hawa klam hajrong i yakhih ha NEHU, u MP warim ka Shillong da ong u wa hawa ki bru na NEHU lai ki wow yachem wa oo hajrong ki kaam ka NEHU, ym jooh bien u wow yaklam iyi iyi neibhah wa sñiaw u wa ym man iwa bha kam u bru saiñpyrthai wow tuklar ha ki kaam ka NEHU.
Da ong u wa nadooh i por wa dang man MP u ym jooh kwah u wow klam paidbah pyrchah ya ka NEHU.
“Chooh chooh katni lada kam u MP nga klam O yeini i kynrum kynram wa i jia hapoh Parliament, da ki phaw lak ngut ki bru wow yoo, ini daw ktah ko ya i burom yong ka skurbah, neibhah wa em boon ki bru kiwa chim ya ka NEHU wa ka toh ka thaw puræ kawa bha”, da ong u Vincent Pala.
Da ong u wa lada ki bru lai ki wow khana iyi iyi wa jia ha NEHU, toh u phah dei thoh næ wow lai yachem bait ya ki Montri wa toh u pait.
Kiwa lai puræ ka North Eastern Hills University (NEHU) hapoh i yahkhmat ka NEHU Students’ Union da chrai ki yei leh mutlop u Vice Chancellor, u Prof. Prabha Shankar Shukla wow ap yei dawa kiwa lai puræ wow pyndam kreh noh ya u Registrar, u Deputy Registrar wei kamjooh ya ki sahep ki wym toh hok wow chah thung kaam.
Ini waroh da pynman ya kiwa lai puræ wow pynman dei yakhih chah thngan khlem da booh por wow dawa leh ya u VC wow hiar chuki u.
Katkam wa ong u Vincent Pala, ha ini i yakhih wa katni da ki NEHUSU leh da em ki bru kiwa e yumut wow lai mih cha NEHU, tangwa da kyntait deiwa ong wa ymtoh wow pynyakhleh kaam Politics ha kani ka thaw puræ.
“Kam ka seiñ saiñpyrthai nga sñiaw oo wym toh u lai tuklar iwa ye wow ktah joor, lada lai ka Congress daw lai sa ka BJP wa kiwi ki seiñ leh daw lai wei daw kylla man ka thaw kawa dap da ki bru saiñpyrthai, wei ini ym man iwa miat ya ka mynried ka NEHU,” da ong u Vincent.
Discussion about this post