Ka Hynñiewtrep Border Dispute Redressal Forum (HBDRF) ynne ka sngi hei yahkhmat u Chairman, u Chandame Sungoh da lai yachem ki wa u Deputy Commissioner yong ka West Jaiñtia Hills District, u AK Singh wow booddien yeiwa dadep e chithi ha ka 27-01-25 heiyatoh wa i chongsuk chongsaaiñ haki thaaiñ Block-I ha kani ka MDC Election yong ka JHADC kawa daw thap Vote haka 21 tarik uni u bnai.
Neiliang u DC da pyntip u wa dadep yaklam wa ki bor District yong ka West Karbi Anglong, Assam hajrong ini i kaam wei da pyntip u leh wym em iwon iwon i pynthut pynwit hei lai i wan yong ki Pnar kiwa chong wa sah ha Block-I ha kani ka Election.
Da pyntip leh wa daw em ka yalang yong ki bor District ka West Jaiñtia wa West karbi Anglong lyngba ka Video Conference ha ka 14 tarik uni u bnai heipor 11:00 waje i step.
Da pyntip u leh wym em i pynthut wei khanglaad ya ka kyrtong yong ka Congress naka 14-Barato Mukroh Constituency ka Banikas Laban kawa na ka chnong Mowluber wow yakhun ha kani ka Election kawa da lai chakhmat kattæ.
Da pynrap u leh wa daw yaklam rap bniah hajrong ini i kaam manda yaklam ha katai ka sngi.
Neiliang ka HBDRF da kyntu ko ya ki paaid wa chong chnong yong ka Block-I wym toh u tieñ wow syier ki, tangwa toh u husiar ya em ki bru kiwa chim kabu wow pynmih klumar wei ka Forum da kyntu chooh chooh ko ya ki Pnar leh wym toh wow pynmih kulmar ki wei wow burom yei chongsuk chongsaaiñ ha ryngkat ki kyndon aiñ wei wow man leh kiwa yatylli ya ryntih kiwa chlur wow yieñskem hajrong ka yurim wa i hok yong ki.
Ka Forum da kyntu ko ya ki lok Karbi leh wow burom ki yei hok manbru yong ki Pnar kiwa chong wa sah ha Block-I wei ymtoh wow khanglaad ki næ wow pynthut yei lai i yieñ yong ki ha ini i por Election wei kamjooh ha ka sngi thep Vote kawa daw pynman ha kani ka 21 tarik.
Discussion about this post