Shillong: U President ka Khasi Students’ Union (KSU) u Lambok Marngar da kyntait u yei tyrwa ka sorkar wow wanrah da ka Ordinance heiyatoh waka aiñ Meghalaya Residents’ Safety and Security Act yow thap ya ki kyndon ka ILP deiwa dawa wa emkaam da ka Inner Line Permit (ILP) hi.
Ya ini da ong u haka lyngkhooh dap 41 snem ka Union ynne ka sngi haka yalang wa pynman ha Lachumiere kawa da wan chimbynta da ki Unit wa ki Circle ka seiñ kamjooh kiwa yahkhmat warim ka KSU.
Hawa yaklam wa kiwa pathai khubor da ong u wa sñiawphylla u wa ki 13 tylli ki ki seiñ wa dawa ILP ym pyntip cha ki ya ini i pynkylla ya ka Residents Act.
Kam wow pynkynmoo ka sorkar da thmu ko wanrah ya kani ka Ordinance hadien ka Election MP cha ka Lok Sabha.
U Marngar da ong u wa ym sñiawthooh de iyi kwah ka sorkar deiwa suki wei ym pyntip cha ki 13 seiñ wei lada ka sorkar sñiaw ko wa ym biang kani ka aiñ toh u pynkrehkaam noh chi syndon daka ILP.
Da ong leh wa ya ka Residents Act toh kawa da pynkha da ki 13 seiñ wei lada em iwon iwon i pynkylla næ i duna ko emkaam wow pyntip cha ki wei ini i leh ka sorkar daw hap chong pyrkhat ki.
Da kdaw u leh wa hapoh Meghalaya ym em ko ki laad wow khang yei psiah i mih ki baar jylla kamwa em ha Arunachal Pradesh, Mizoram wa Nagaland, kawa pynman ya ka jylla kawa suk ya kiwon kiwon u psiah u mih ki khamtam ha kini ki por wa da jan pyndep ka Assam ya ka National Register of Citizens (NRC).
U Marngar da ong u wa ka North East Students’ Organization, kawa ka KSU leh man dkhot da dep phah chithi ko cha ka Home Ministry yow pynkrehkaam yaka ILP hapoh ka jylla.
Ha iwi tawon i liang da pynsñiaw u yei sñiawkhia wa slem ka sorkar wow pynlait ya ka tulop kiwa sikai kiwa man kam u budloom ka imlang sahlang neibhah khem em ki ym em kitæ ki Chief Minister wa ki Minister.
Da klam u leh chaphang ki kaam khappood heiwa ki bru yong i da chah ktah bha ki.
Discussion about this post