U Secretary yong ka chnong Namdong-A, u S. Thubru hadien wa da yoo u yei sait khooid u Dolloi ka Elaka Nongjngi hajrong i lehbor yong oo ya i thaw yong ka chnong, da ong u wa ini i pynche toh i wym em yurim neibhah wa u Dolloi ym em pynche tikna u khamtam yei heh i thaw heiwa u Dolloi da tip u wa i thaw wa u Romario Sungoh da thied u na u Ankur Star Gympad ha ka 30-06-20 kawa toh ka Patta kawa heh du 4,548 Square Meter tangwa kammon won u Dolloi da nood u wow tyrwa (Recommend) da ki phaw Acre deiwa kylli wa ileh u Dolloi ym em pynche u ya kani ka phang wa kongsan wa ha kawon ka yurim wa nood u wow e cha uni u bru ya i thaw yong ka chnong kawa da heh khlem duna ya ka 60 Acres iwa kam ka chnong ym ye ko wow pdiang da kammon kammon leh.
Da pyntip leh wa hadien wa da yoh yutip wa u Dolloi da lai Survey wei Recommend u ya kani ka thaw, kam kiwa yahkhmat ka chnong da lai ki wow yachem wa oo markhmat heiwa u Dolloi da ong u wa ym ye de wow pyndam ya kani wei hap ki wow ujor cha u Revenue Officer, kamtæ neiliang yong ka chnong da leh ko ya ini ha ka 25-03-21, heiwa neiliang u Revenue Officer da khut u ya waroh nadooh u Dolloi, u Romario Sungoh wa kiwa yahkhmat chnong ha ka 27-04-21 heiwa da ekti ya ini i bichaar cha ka Village Court yong ka Elaka Nongjgni.
Ya ini da pyntip leh cha u Chairman wa Secretary yong ka Village Court nadooh ka 19-10-2021 wei wow pyndep ya ini hapoh ka 15-09-21, tangwa da lyngngoh wa ha i pynche u Dolloi da kwah u wow pynbiej, wei khlem da e ktien won ya ki kam kiwa yahkhmat chnong hadooh wa hap wow booh biang ya ka ujor cha u Revenue Officer ha ka 16-09-2021, neidaw wym burom u ya ka JHADC katkam wa da phah wow leh u.
Da kdaw leh yei ong u Dolloi wa ym em ujor cha oo toh iwa bakla neibhah ki waheh ka chnong na i por cha i por da yaklam ki wa u Dolloi hajrong wym toh u Recommend ya kani ka thaw tangwa ym em ap u yeini, heijooh i por u waheh chnong da klam pyrchah u ya u Dolloi wa ym lai u neibhah wa ym em pyntip deiwa biang lane khlem e da iwon iwon i thoh yow lai Survey ya kani ka thaw neibhah wa ka chnong da khang pyrchah wei da ujor leh cha u Revenue Officer.
Neiliang yong ka dorbar chnong da rai ko leh wow pynemkaam ya kani ka thaw ka chnong kamwa jooh pynemkaam nadooh warim wei da kyntu ya u Ankur Star Kympat wa ya u Romario Sungoh wa ym toh wow kam ya ini i thaw ka chnong katkam i heh ka Patta yong ki khnang yow lait na iwon iwon i kulmar ha ka imlang sahlang neibhah kam ka chnong khlem pyrchah ki ya ini i em i thaw yong ki lada ym kam ki yei thaw ka chnong.
Neiliang ki ar ngut ki dkhot ka Village Court u Riyoo Pulang wa u Kiton Samati da ong ki wa ini i pynhce u Dolloi toh du wow pynbiej ya ki dkhot yong ka Village Court wei ya ka chnong wa ya ka Elaka leh, deiwa ong wa kammon wa nood u Dolloi wow ong wa da phah ya ki wow ya pynbait chwa tangwa khlem da e yutip cha kiwa yahkhmat ka chnong ka Namdong-A wow leh ki kamni hadooh wa da hap wow ujor biang cha u Revenue Officer hadien wa da kut ka 15-09- 2021 wei ha kawon ka yurim wa uni u Dolloi uwa man u Chairman da nood u wow leh samen ya kani ka kaam khlem da pyntip lang cha waroh ki dkhot ka Village Court wow ya phyllu yumut lang ya kani ka kaam.
