Ka Supreme Court ka ri ynne ka sngi da phah Notice ko cha ka sorkar pyrdi, Uttar Pradesh wa Uttarakhand hajrong ki mukotduma wa pyrchah yaki aiñ wa pyrchah wei pynchitom yei kylla niam hei pyrtuid i bia lane deiwa thok wa chukor.
I bichaar da ki le ngut ki Judge wa khlieh da u Chief Justice ka India u SA Bobde da phah ko ya ki Notice tangwa kyntait ko wow pynsangeh ya kini ki ar tylli ki aiñ ha kini ki artylli ki jylla hanla da e daw wa kini ki aiñ da pynemkaam ya ki wow pyndik yaki bru kiwa bia wa ki wym yatoh ka jooh ka niam.
Ka yung bichaar da ap ko ya ki artylli ki mukotduma, kawi wa wanrah da ki muktiar katwa kawi da ka NGO Citizens for Justice and Peace.
Haka mukotduma da ong wa ki hukum (Ordinance) wa da pynkrehkaam ha ka jylla Uttar Pradesh wa Uttarakhand man ko pyrchah yaka imlang sahlang kamjooh yaka riti synchaar ka ri deiwa kdaw leh wa kam kini ki jait aiñ leh da pyrkhat ya ki ha Madhya Pradesh, Karnataka, Haryana wa Assam.
Ha Uttar Pradesh da man pyrchah yaka aiñ wow kylla niam neibynta wow bia, deiwa pynbor, deiwa phon lane deiwa thok wa chukor wei kiwa leh pyrchah daw chah kem ki nadooh chi snem hadooh san snem najrong ka kuna wa T. 15,000. I chah kem ye ko u man 5 hadooh 10 snem lada kylla niam ya kitu kiwa man kam ki Schedule Tribe lane Schedule Clan wa i pyndaiñ kuna wa T. 25,000.
Ya kani ka aiñ ha Uttar Pradesh da pynkrehkaam da u Chief Minister u Yogi Adityanath hadien wa kular u wow pyndooh noh yaka “Love Jihad”, i kyntien wa pynemkaam da kitu kiwa pyrchah yei bia hapyrdi u chynrang Muslim waka kynthai Hindu.
Ha Uttarakhand ya kani ka aiñ da tip kam ka Freedom of Religion Act kawa da mynjur ha u 2018.
Neiliang ka Supreme Court da ong ko wa ya kani ka mukotduma toh u chong bichaar chwa da ki High Court kiwa dang sah katni ha Allahabad wa ha Uttarakhand High Court kiwa man hajrong ki jooh ki phang.
