Hadien wa ka sorkar da pynkrehkaam ko ya ka Meghalaya Residents Safety and Security Act, 2016 deiwa booh leh ya ka khyrdop ha Umling, Ri Bhoi District. Ka kynhun yong 6 ngut ki muktiar da booh ki da ka mukotduma Public Interest Litigation (PIL) ha ka Meghalaya High Court wow pyrchah ya ka MRSSA ha ka 22 tarik u Kmaichonglad (Dec) 2020.
Hawa kylli ya u Prestone Tynsong uwa man leh u Symbood Montri Rangbah ka jylla, da ong u wa ka sorkar ym pu ye ko wow klam iyi iyi hajrong katai ka PIL, neibhah wa ka High Court leh ym pu pdiang ko ya katai ka PIL neibhah wa dang em chuti. Da ong u wa ka sorkar daw yang chwa ko ya ka bichaar hachwa wow ong iyi iyi leh.
U Tynsong da ong u wa ka sorkar hawa wanrah ko ya kawon kawon ka aiñ næ chwa wow mynjur ya ka MRSSA, 2016, da dep ko wow puræ bniah bha wei da ya yasyllok leh wa ki stat aiñ. Da ong leh wa i wai ya ka Entry wa Exit Point ha Umling ym toh wow pynthut yei lai i wan, tangwa yow tip ya ki bru kiwa wan psiah cha ka jylla.
