Ki 41 ngut kiwa kreh yow tih ya ka Silkyara Tunnel wa em ha jylla Uttarakhand da sahkut ki khlem ye wow lai pynlait ki la phra sngi nadooh wa jia hei step ka 12 tarik uni u bnai hadien wa oor kani ka Tunnel.
Ini i oor ka Tunnel iwa jia kamwa 200 Meter naka thaw psiah da kset ko ya kini kiwa kreh kiwa em kamwa 2,800 Meter chapoh heiwa kani ka Tunnel toh kawa da tih wa jrong 4.5 Km kawa chna da ka Navayuga Engineering Company hei pait lang ka National Highways & Infrastructure Development Corporation Limited.
Kani ka Tunnel toh kawa yow pynyabi yaka chnong Silkyara waka Dandalgaon wa em hapoh ka Uttarakshi District wei nyngkong da andtaad wa daw suk bha u sai ya kini ki bru tangwa hadien wa sdang wow khloh ya iwa oor da mih ki dak wa daw oor chooh chooh kani ka Tunnel kamtæ da hap sangeh noh.
Ya kiwa sahkut da pynlait la-ær cha ki lyngba ki Pipe wei da phah leh ki baam wa khian.
Kattæ da pyrkhat wow tih ar tylli ki Tunnel yow poi cha kini kiwa sahkut kawi na chrooh wa kawi naneiñ.
Sa iwi iwa eh toh neidaw wa ini i thaw em i ha i thaw wa man loom kamtæ da chem chitom wow wanrah da ki kor wa heh wa khlanbor u tih.
Da em leh i pyrchang wow wanrah ya ki kor wa khlanbor tangwa da man iwa da chimpor bha.
Ynne won ka sngi da wan u Arnold Dix, President ka International Tunnelling & Underground Space Association uwa man kam u bru chemphang ha ki kaam tih Tunnel yow thooh laad kammon wow sai ya kini kiwa sahkut.
Discussion about this post