Ka Pradesh Election Committee yong ka seiñ Congress ha ka jylla, ynne ka 2 tarik da chim ya ka rai wow pynyakhun ya ki kyrtong ha ki le tylli ki Election chiteiñ samoi kiwa daw pynman ha ka 30 tarik uni u bnai ha Mawryngkneng, Mawphlang wa Rajabala.
Uwa yahkhmat ka Congress Legislature Party, u Dr. Mukul Sangma da pyntip u wa hadooh kattæ ka PEC da dep rai ko ya ar ngut ki kyrtong neibynta ka Election chiteiñ samoi, katwa ya uwi won daw chim rai myntu hi ka sngi wei hadien itæ daw phah cha ka All India Congress Committee (AICC) wow yoh yei mynjur.
Da pyntip u wa ya ki kyrtong wa ka Party da rai ko wow e Ticket da chim hadien i ya syllok lang leh wa kiwa yahkhmat yong ki Circle wa ki Unit na ki Constituency kiwa hap wow lai cha ka Election ha ka 30 tarik.
U President ka MPCC, u Vincent H Pala da ong u wa ka Committee da dep ko wow rai ya uwi u kyrtong neibynta ka Mawryngkneng Constituency rap nachwa, tangwa katni dang me sa uwi uwa kwah yakhun ya ka Election, wei neiliang ka Party da ong wa daw pynsñiawthooh ya kiwa yahkhmat na Mawryngkneng wei hadien daw phah leh ya i pyrtuid yong ki kyrtong cha Delhi.
Hawa kylli, u Pala da ong u wa ka Party em ko i kyrmen wow jop ya ka Election chiteiñ samoi, neibhah wa ki paidbah da yoo ki iyi wa ka sorkar MDA kawa synchaar katni da leh ko, wei kiwi won ki daw toh wa ka Party ka em ko ya ki kyrtong kiwa da rim wa kiwa da tip ya i long i man wei ki leh em ki yei kyrmen, tangwa da ong u wa ka Election chiteiñ samoi chong dooh ko hei kreh chitom kiwa yahkhmat ka Party.
Hawa yatoh wa i mih u MDC ka Party wow yakhun na ka NPP ya ka Election ha Mawphlang, u President ka MPCC da ong u wa kiwon kiwon ye ki wow pyrchang wow yakhun wei ym em wa khang, wei ym toh iwa bakla ya u Lamphrang Blah wow yakhun. Wei heijooh i por da ong u wa u MDC wa da jop soo sien da jooh paan Ticket u wow yakhun ya ka Election MLA, tangwa wa dang em u Kennedy uwa man u MLA warim ka Party kamtæ ym ye wow e.
