Hadien wa chah bom yap ki 2 ngut ki Dkhar ynnin ka sngi ha Ichamati, ka tyllong khubor wa da yoh da khana wa nei takit kawa da leh hadooh kattæ, ym pu ye u ong wa i chah bom yap ki 2 ngut toh nei yakhih pyrchah CAA kawa da pynman ha yaaw Ichamati, tangwa yeini leh daw hap wow pynsakhiat hadooh wa pyndep yei takit yong ki pulit.
Hawa yaklam wa u Superintendent of Police ka East Khasi Hills, u Rituraj Ravi da ong u wa ki pulit da takit ki na waroh ki liang hawa yatoh wa ini i chah pynyap ki 2 ngut ki Dkhar ha ka thaaiñ Ichamati ynnin ka sngi.
Hawa kylli heiyatoh wa i yakhih pyrchah CAA da kawi ka seiñbhalang wa itai wa jia, u SP da ong u wa yeitæ leh ki pulit ym ye u dam u takit, tangwa u ong wa ini da jia i na ini i daw leh ympu ye u ong wei ka takit u pait ko ya waroh ki liang.
U SP da khana u wa ynnin ka sngi heipor kamwa 5:00 waje i janmiet, u OC ka Shella Police Station da pyntip cha oo wa em wa chah pynyap ha iwi i thaw iwa jngai du kamwa 100 meter na ka yaaw Ichamati, wei katwa dang takit ha itai i thaw da tip biang wa da chem sa iwi i metyap na kawi ka thaw ha ka thaaiñ Mawlong kawa jngai kamwa 4 Km na ka yaaw Ichamati.
Da khana u leh wa ha ini i jia, ki pulit da sdang ki wow chem kse ya ki bru wa emkti, tangwa ym pu kem ya uwon uwon hadooh kattæ, wei da pyntip u leh wa da ujor 2 tylli ki FIR hajrong ini wa jia chah pynyap hapoh Shella Police Station.
Hawa kylli, u SP da khana u wa hadien wa jia itai, da phah chooh chooh ki pulit cha Shella wei kamwa man kattæ, i long i man toh iwa da jai jai wei iwa chngaaiñ.
Discussion about this post