U President ka Seiñraij Jowai u OR Challam da ong u wa uni u snem 2020 toh u snem wa sih wei ha kini ki 4-5 bnai katkam ki kyndon (SOP) ka sorkar Meghalaya da ong ko wa hawa lai tlep lai thang bru toh u em 20 ngut ki bru tangwa ya ini leh ym ye u bood heiwa da wan boon ki bru, kamtæ katu da chah u wai ki thaw mane Blai da em boon iwa eh neidaw wa em boon ki kaam wa hap u pyndep chwa wow psiah chapoh ki thaw mane Blai.
Kamtæ da ong wa i long i man dang man ko kawa ym em man chngaaiñ neidaw wa katwa dang mih ki sngi dang joor ka khlam, heijooh i por da e khublei u leh ya kiwi kiwa yahkhmat yong ki niam waphær waphær kiwa da chim yaka rai wow wai noh yaki thaw mane Blai yong ki wei yow man ko leh kawa lai bait.
Tangwa neiliang ka Seiñraij Jowai ym pu wai ko hadooh wa kut uni u snem wot hadooh u 2021 leh lada i long i man ym pu man i kam nachwa, wei daw hap pyrkhat chwa lada ym ye wow pynbait yaki bru neibhah wym ye u phiah yaki para wa ngait ya mih i sñiawthooh bakla, deiwa e nongmuna wa lada ka thaw mane Blai ye ko wow chim du 100 ngut tangwa ki bru wa wan da poi ki 200-300 ngut, kamtæ kiwa tam daw hap ki wow liwan kamtæ em i eh.
Chooh chooh daw mih iwa kylli deiwa ong ya uwa mahajon, uwa dooh, kiwa da stat kiwa dang biej, deiwa ong wa toh u ngait wa u Blai Trekirot dei kyrkhu yong oo daw pynlait u na kani ka khlam wei ka Seiñraij ka ngait ko wa emkaam wow booh hei ngooh i dem neibhah wa u Blai em u ha waroh ki thaw lada u nood u klong man u uwa khooid u Blai da em bait u.
Da pynkut u deiwa khut wow dawai Blai lang waroh yow pynlait ya i na kani ka khlam yow rah yaka cha ki thaw wa ym em de u bru wa ye u poi.
