Hanla ka sorkar da pynbna ko wow pynlait ya ki khynnah wa lai puræ ka jylla Meghalaya wow yakhun ya ka Common University Entrance Test (CUET), tangwa kiwa boon ym pu em che ki hajrong ini i hajrong ini i pynbna da u Montri Rangbah, u Conrad K Sangma hadien wa yachem u wa u Montri ka chnat Puræ Puthi ka sorkar India, u Dharmendra Pradhan ha ka sngi nyngkong kani ka tayaw.
Hawa yaklam wa u Montri ka chnat Puræ Puthi ka jylla, u Lahkmen Rymbui da ong u wa hadooh katni ka jylla ym pu yoh ko yei pyntip (Notification) wa da pynlait ya ki khynnah wa kwah wow puræ ha ki College ka sorkar jylla wa ki College Private na ka CUET.
U Rymbui da ong u wa ka sorkar jylla da yooluti ko wa ka sorkar pyrdi daw phah ko yei pyntip ha kini ki sngi neibhah i pynpsiah pyrtuid ya ki khynnah neibynta wow yakhun ya ka CUET daw kut mynstep ka sngi 5 tarik. Tangwa u Rymbui da ong u wa kamwa man katni, ka sorkar jylla da chim bait ko wa i yaklam hapyrdi u Montri Rangbah ka jylla wa u Montri ka sorkar pyrdi toh ka rai wa khaddooh wei ym pynkrehkaam ya ka CUET.
Hawa kylli hajrong ki khynnah kiwa da dep wow pynpsiah pyrtuid kiwa em palat 600 ngut wa kiwa da dep su leh T. 550, u Rymbui da ong u wa ka sorkar ym pu ye ko wow ong iyi iyi lada daw pynyuiñ noh namo ym pynuiñ ya ka poisa, tangwa da pynrap wa ka poisa ym sepai, neibhah deiwa yakhun ya ka CUET ym mut du wow yoh puræ ha ki College kiwa em ha ka jylla, tangwa ka CUET daw wailaad leh ya ki khynnah wow puræ ha kiwon kiwon ki College kiwa pynkrehkaam ya ka CUET.
