Ynne ka sngi, neiliang ka Hynniewtrep National Youth Front (HNYF)-Eastern Region hapoh i yahkhmat u Pynbiang Rymbai da lai ki wow e dorkhat hakhmat u Superintendent of Police yong ka West Jaiñtia Hills District, u C. Syrti hajrong i chah tynyap dusmon u Kyrshandame Talang uwa chong wa sah ha ka chnong Mupliang.
Kam wow pynkynmoo wa u Kyrshandame Talang da chah tynyap u ha ka 10 trik u Wisu (Mar) ha ki chnong khappood ka chnong Mukhla-Myrjai heiwa yei metyap da chem nei thaw wa tip kam i Moosdai wei ya kini ki bru thrang snaam ym pu em yoh kem hadooh kattæ leh.
Hawa yoh u yaklam wa u SP, da pyntip u cha ka seiñ wa dang pynman yei takit yow chem kse ya kiwa emkti wow tynyap ya uni u khynroo.
Kamtæ neiliang ka seiñ da kyrpaad joor ko ya u SP wow chimkhia ya kani ka kaam khang wa kam kini ki jait kaam ym jia de i hadien habood wei ka seiñ leh da beiñ joor ko ya kini ki jaitbru kiwa da sariem wa ki mrad.
Da pyntip leh cha u SP wa ki manbei manpa kamjooh ki payu para da khana ki cha ka seiñ wa da tieñ da smieh ki wot wow lai bri lai lyngkha neidaw kam ini i pynyap bru da jia i man-i-por.
Neiliang ka seiñ hi ka phah ko da ka khubor wa che cha kini kiwa pynyap bru wa lada ka seiñ chem kse ko ym maap ko la kammon kammon ya kini ki jaitbru kiwa pyntieñ pynsmiet yaka imlang sahlang, pynkut ka kyrwoh na ka seiñ.
Discussion about this post