Shillong: U Montri wa pait ya i kaam pohyung ha ka jylla, u Lahkmen Rymbui da ong u wa kamwa man kattæ ym pu em yoh yutip næ ka Report wa em ki khynroo wa lai psiah dkhot wa kiwon kiwon ki seiñ kieñ suloi. Ya ini u Rymbui da ong u hawa kylli hajrong i kam ka HNLC wa em ki khynroo wa dawa ILP kiwa da lai wow pynyabi wa katai ka seiñ.
Hawa yatoh wa i pynbaad wa ki pulit pynwit ki ya ki dkhot ka HNLC kiwa da lai pyndem næ kiwa da chah kem, u Montri da ong u wa ini i pynbaad toh kawa ym em yurim wei pynyoo ko wa toh i kamram yong ki pulit wow takit neibhah ye u em wa chem ki pulit wa em ki kaam wa pyrchah yaka aiñ, deiwa ong chooh chooh leh wa kam u Montri ym ye u wow pdiang wa pynwit hi-eh lada ym em leh ki iyi iyi leh, tangwa lada em i suba sih toh i kamram ki pulit wow takit ya uwon uwon u bru.
Da ong u wa lada ki pulit ki takit ki, wow pynbaad won wa lehbeiñ næ pynthut toh kawa ym ye wow man neibhah toh i kamram hawa em i suba ya kiwon kiwon.
Hawa kylli, da ong u wa ka chnat pulit toh kawa paitbniah ya kiwon kiwon ki kaam kiwa man pyrchah yaka aiñ, tangwa da kyntu u leh ya ki khynroo næ ki paidbah kiwa chem yei eh wow pyntip ki cha ki Superintendent of Police ha ki District khnang wa lada em i leh bakla ki pulit, na ka yung krehkaam yong u SP u ye wow chimkhia næ wot ha ka kyrdan DIG.
Hawa kylli chooh chooh, u Rymbui da pyntip u wa em ki Case kiwa ye wow maap wei em won ki wym ye u maap, wei ya kiwa ye u maap, ka sorkar da leh ko ya iwa emkaam.
Hawa yatoh waka ‘Rehabilitation Package’ næ ka song yarap, u Montri da ong u wa kam kini ki yarap toh kiwa na ka sorkar India, tangwa ka sorkar jylla lada ym em mynkna ko ya kawon kawon ka Scheme, ka pyrchang ko wow yarap ya ki khynroo wa yieñ ha ki kjat yong ki hi, wei ym man ko kawa bha won wow pyrkhat wa ka sorkar u pynbiang sah waroh chirta.
Da ong wa toh i kamram yong waroh kiwa chong chnong wow ya krehlang neibynta wow pynneh ya i suk i saiñ lada em kiwa thmu wow pynthut, wei toh leh i kamram yong ka sorkar wow paitbniah khnang wa ki khynroo ym ngat ki ha kiwon kiwon i chah pynthut kamwa da pynbaad.
Ka HNLC da pynsñiaw ko yei kwah wow yaklam yasuk wa ka sorkar, tangwa kamwa da kam won da yoo wa dang pteiñ leh wow pynpsiah ya ki dkhot, neiliang u Rymbui da ong u wa i chongsuk chong saiñ toh kawa emkaam tam neibynta wow ku ka jylla, deiwa pynsñiaw leh wa ym ye wow jop ya i eh deiwa kieñ suloi, wei khnang wow wanrah ya i suk i saiñ da emkaam i yaklam yasuk wa ka sorkar khnang wa ki kaam pyrchah yaka imlang sahlang ym em de ko hapoh ka jylla Meghalaya.
Hawa yatoh wa i lai chakhmat yong ka BJP Meghalaya wow wanrah yei yaklam yasuk hapyrdi ka sorkar India wa ka HNLC, u Rymbui da ong wa ha oo samen ym em yaphær lada em kiwon kiwon ki kynhun wa ye u pynpoi cha i yaklam neibynta wow wanrah ya i suk, tangwa wow lai du wow yoh u mih khubor ym yahap ko, deiwa pynrap leh wa ha ki por wa rap nachwa leh da sakhi ya ki seiñ niam wa ki seiñ kreh monsñiawbha kiwa da chim ya ki laad ki luti wow wanrah cha i yasuk wei da yarap ko leh wow pynneh yei suk i saiñ ha ka jylla.
