U Montri Rangbah ka jylla, u Conrad K Sangma ynne ka sngi hapoh ka Yung Dorbar Chna Aiñ da ong u wa ym pyndam ya ka aiñ Meghalaya Regulation Gaming Act and Rules, 2021 neibhah khlem kani ka aiñ, ki kaam yakhle daw mih daw roi ki wei ym em wa ye u khang leh ya kiwa chong chnong ka jylla wow chimbynta neibhah hapoh kani ka aiñ da khlam che wa ya kiwa chong chnong ka jylla ym chah u psiah ki cha kini ki thaw yakhle wei kani ka aiñ da man ko kawa bha ya kitu kiwa khuslai ya chah ktah ki khynroo khyllood ka jylla na ki kaam yakhle.
Ya ini da jubab u Conrad ha ka Zero Hour Notice wa da wanrah da u MLA ka Nongkrem, u Lambor Malngiang uwa da dawa wow pyndam noh ya kani ka aiñ Meghalaya Regulation Gaming Act and Rules, 2021.
Da ong u wa neidaw wa da duna ware i yoh dan ka sorkar na ki Royalty ki mar pohkhyndaw iwa da hiar naka T. 600 klur cha ka T. 100 klur, kamtæ ka sorkar da pyrkhat ko kammon wow leh ya ini heiwa da thmu wow booh da ki Gaming Zone yow pynku ya i yoh dan ka sorkar.
Da khana u wa da pykhat wow booh ya kini ki thaw yakhle yow pynmih T. 500-T. 600 klur ka dan, deiwa booh ya kini ki thaw cha jngai na ki chong ki thaw ha ki thaw wa khappood dei wym chah hi leh ya kiwa chong chnong ka jylla wow psiah ki chapoh ini i thaw wei da ini i thmu da dep wow lai chakhmat.
Da khana u wa hawa sdang uni u snem da em 8 ngut kiwa da yaleh License yow booh ya ki Casino heiwa na kini da yoh 3 ngut ya ka Provisional License kawa krehkaam du 6 bnai donhi kawa da e ha u Wisu (March) wei ym pu em e ya ka NOC wow booh ya kiwon kiwon ki Casino.
U Conrad da khana u wa hadien ini, kiwa yahkhmat niam da wan ki wow yachem wa oo ha u Naisan kiwa da pynsñiaw yei sñiawkhia, heiwa da pyntip u cha ki wa ym em i thmu wow booh Casino ha Shillong tangwa yow booh ha ki thaw wa em chajan ka Guwahati.
Da khana u wa kamwa man katni da sangeh ya waroh ki kaam wa yatoh wa ini wei ym de leh iyi iyi ya kitu kiwa da yaleh License wei ym e de leh ya ki Provisional License. Wei yeini da khana u leh ya kiwa yahkhmat niam kamjooh ya ki seiñbhalang wa ym lai de chakhmat yeini i kaam nadooh u Naisan.
Da ong u leh wa da pyrchang u wow pynsñiawthooh ya kiwa yahkhmat niam ya ini i thmu ka sorkar kamjooh ya kiwa yahkhmat seiñbhalang tangwa ym em pdiang ki ya ini i thmu ka sorkar kamtæ neiliang ka sorkar da rai ko wow dam noh ya ini waroh wei ym em de leh iyi iyi nadooh u Naisan wei kam ka sorkar ap ko yei sur ki paidbah.
Kamtæ da ong u wa ya ini i kaam daw hap wow yaklam u ya pynsñiawthooh chooh chooh wa waroh yow ya sñiawthooh lang.
