Ka chnat puræ puthi yong ka jylla da chim ko ya ka rai wym pynman ya ki Exam wa dang sah yong ka Class XII, katwa ya ki Exam Class X wa Class XII wa ki khynnah ym yoh ki wow lai thoh neidaw yong u COVID-19 daw pynman hapyrdi u Naiynñiaw katwa ya ka Result neibynta ki khynnah Class XII da booh wow pynbna chwa ka 31 tarik u Naiynñiaw 2021.
Hawa klam ynne ka sngi, u Montri wa pait ya ka chnat puræ puthi ha ka jylla, u Lahkmen Rymbui da pyntip u wa ka chnat da rai ko wym pynman de ya ki Exam Class XII wa dang sah, kitæ ha ka Subject Computer Science, Statistic, Vocational Studies wa Western Music, tangwa i e Marks neibynta kitai ki Subject da ekti ha ka MBOSE katkam wa chah ki kyndon.
Ha i jooh i por da pyntip wa em 74 ngut ki khynnah wa yakhun ya ka Exam Class X (SSLC) kiwa khlem yoh wow yakhun kattu katni ki Subject, wa 34 ngut ki khynnah kiwa khlem yoh wow yakhun ya waroh ki Subject, katwa ki khynnah Class XII kiwa dooh wow yaleh ya kattu katni ki Subject da em ki hadooh 92 ngut wa 15 ngut won kiwa khlem yoh wow thoh ya ki Exam neidaw yong u COVID-19.
Da ong u wa neibynta kini ki khynnah, ka chnat da rai ko wow pynman biang ya ki Exam ha u Naiynñiaw, heiwa ka chnat daw leh ko ya iwa emkaam hachwa wow pyntip cha ka MBOSE.
