U Symbood Montri Rangbah ka jylla, u Prestone Tynsong da ong u wa ymtoh wow pynlai yumut næ chimkhia ware yei em kiwa pynyieñ lama ka seiñ HNLC ha ka 14 tarik uni u bnai, deiwa pynrap wa i lai pynyieñ ya ka lama yong ka HNLC toh iwa da leh da kiwon kiwon wa da em chwa ya ka lama nadooh nachwa, wei boi i pynyieñ toh iwa da leh chongchit.
Kam wow kdaw heini, ha i step ka ka 14 tarik kawa toh ka sngi wa ka seiñ dap ko 35 snem, da chem ya ka lama ka seiñ HNLC ha yingkieñ Wahumkhrah hajan u loom thang bru ha Jaiaw, wei kani ka lama da kyrriah noh da ki pulit.
Hawa kylli, u Prestone da ong u wa ymtoh wow chimkhia ware ya kam ini, neibhah da jia i du chithaw don, wei nachwa hawa em i lehkmen ka ri kam ka Republic Day wa Independence Day, ka HNLC jooh pynman ko dei khang chnong wow dam u chimbynta ha kini ki lehkmen tangwa uni u snem ym em de kam itæ.
U Symbood Montri Rangbah da ong u leh wa ini pynyoo i ya i dak wa miat wei pynyoo i wa i klam yasuk da sdang lai i chphrang wei daw man iwa jop.
Hawa kylli hajrong i klam yasuk, u Prestone da ong u wa i klam yasuk da sdang i wei ka sorkar daw yang ko hadooh wa yoh ya ka bui na waroh ar liang.
