Jowai: Hadien i joor u slap ka lær iwa da wanrah yei jæd i pra ki luti syngkieñ, ki yung ki sem, ki skur, i oor ki dieñ ki seij, ki kynroh ha kylleiñ ki thaw ka West Jaiñtia, da man leh i tynjooh wa khroo yaki warep wa hap u chaniah nei rep i riang yow pyndap pynkot yei emkaam ka yung ka sem neibhah wa boon hi ki warep ka District da chah pynsih pynpra ki thaw rep, ki pynthor ki hali yong ki hei rukom waphær waphær iwa da pyndooh mynsien yaki deiwa ong wymtip de ki kammon u im u dap u kot myntu u snem.
Heiyatoh wa ini i chah ktah ki paaid warep, da yoh u sakhi ha kawi naki thaw rep wa heh kawa haap hapoh u pood u ang ka chnong Pynthor Langteiñ, West Jaiñtia Hills District.
Ya kani ka thaw rep datip kam ka Pynthor wei man ko leh kam u kchu-ja yong ki paaid warep ka chnong Pynthor Langteiñ, ka chnong Sohmynting wa kiwi ki chnong wa marjan kiwa da chaniah u pyndap hayung hasem yow dap bnai dap snem u khoo u kba, tangwa i joor u slap ka lær ha kini ki sngi da pynjynjar mynsien ko yaki paaid warep kiwa da chah ktah ki hali neidaw wa i heh ka um da rah ko ya ki moo ki chyiap chapoh ki hali, em ki hali kiwa da dep bet dep thung em won ki wym pu em dep.
Kini ki moo ki chyiap da antaad toh iwa rah ka um na kylleiñ kamjooh naki loom wa em cha jan kani ka pynthor iwa tih da ki bru neibynta i emkaam yong ki.
Hei yaklam wa ki kattu katni ki warep naka chnong Pynthor Langteiñ, kiwa na Muphlang da ong ki wym tipsap de kammon u man u kba u khoo myntu u snem neibhah wa ki hali wada dep bet dep thung da hap u leh arsien, i lut nadooh i bor bru, i wow thied sboh da man i archah nalor wa hap u pynkhooid chwa yaki moo ki chyiap.
Khana haroh ki wa na kani ka thaw rep jooh yoh khoo ki wow bam chisnem chisnem tangwa neini i chah ktah wei i palat por wow yoh u thung da tikna hi wym yoh de ki ya u khoo u kba kamwa jooh, wei wym nood hi de ki leh u pyntikna boi tang u man leh wym man de u khoo u kba.
Discussion about this post