U MLA ka VPP na North Shillong, u Adelbert Nongrum da pynsñiaw u yei wym yahaap yei rukom bhah ya ka State Quota ya kitu lai puræ MBBS, BDS, BHMS, BAMS, BASLP, BUMS wa B.Sc Nursing iwa dang dep pynbna ka sorkar ha kani ka tayaaw neibynta u snem lai puræ 2023-24.
Da ong u wa ki pyrtuid wa da pynbna toh katkam ka da yoh namo ka Score hadien wa yaleh ki yaka NEET UG 2023 wei ka sorkar da bhah ko hapyrdi ki Open Category, Khasi-Jaintia Category wa Garo Category heiwa ha ka Open Category da em 30 tylli ki pyrtuid, 150 tylli ha ki Khasi-Jaiñtia wa 150 ha Garo.
Kamtæ da kylli u wa ileh da yabhah ya kani ka State Quota hei rukom ka Roster System hawa da dep wow pynbna da u Montri Rangbah wa ka Roster ym ktah ko ya ki kaam lai puræ hapoh ka State Quota.
U Adelbert da ong u leh wa da pyntip cha oo wa da em ka Office Memorandum wa da pynmih ha ka 13-05-22 da ka chnat Health & Welfare Department ka sorkar Meghalaya wa i rukom jied ya kiwa lai puræ MBBS wei ini toh u man ko deiwa khlem leh chiliang wei kamwa man salonsar neibynta waroh wei u bood katkam ka State Reservation Policy.
Hajrong ini u Adelbert da kylli u wa hapoh kawon ka aiñ namo ka kyndon wa jied ya kini kiwa daw yoh u lai puræ neibhah ym em aiñ wow leh yeini, kamtæ da ong u wa ka State Reservation Policy ym toh u krehkaam ko ya ki kaam lai puræ neibhah ka Reservation Policy toh du ya kiwa thooh kreh donhi.
Ini i pynbna pyrtuid ka sorkar ym em mih i khñium na kiwon kiwon neibhah wot hapoh ka Open Category leh da em i pyrtuid ki Khasi, ki Jaiñtia kiwa da psiah lang 8 ngut.
Neiliang u Adelbert ha ka kyrwoh wa da phah u da ong donhi u wa pyrchah u yeini tangwa ym em won ong kammon kwah u leh lane tyrwa u da kiwi ki laad wow jied ya kiwa yoh u lai puræ hapoh ka State Quota.
Puræ leh: Pynbna ka sorkar yei pyrtuid ki wow yoh lai puræ MBBS, BDS, Nursing wa kiwi de
Discussion about this post