Kat dang mih ki sngi ka khlam u COVID-19 leh dang joor ko wei da poor ko ha waroh ki jylla ka ri, kamtæ kiwa boon hi ki bru da sdang pynemkaam ki da ki N95 Mask khamtam kiwa em i thaw wa lait la’ær namo ki Valve Respirator.
Neiliang u Director General of Health Services (DGHS) ka sorkar pyrdi, u Dr. Rajiv Garg da thoh u ya ka chithi ynnin ka 20 tarik heiyatoh wa i pynemkaam bakla ya ki N-95 mask (kiwa em Valve Respirator) da ki paidbah.
Kamtæ da kyntu u ya ka sorkar wow chimkhia yeini wei wow pyntip ya ki paidbah wow pynemkaam da ki Mask wa chna ha yung kiwa tymmoh ya i ktien wa i khmut katkam wa da booh hukum ka sorkar lyngba ka website ka Ministry of Health and Family Welfare.
Da ong u wa i pynemkaam ya kini ki N-95 Mask kiwa em Respirator ym yada i nei poor u COVID-19 neibhah ym khang i ya uni u khñiang wow lait u na kini ki Mask lyngba kini ki Respirator.
Kini ki jait Mask ym pynkhooid ki ya ka la’ær riñ næ pynhiar mynsien wei dang lah wow pynemkaam da kiwi ki jait Mask kiwa khlem em kini ki Respirator namo da ki N-95 wa em artylli ki Respirator kiwa pynkhooid ya ka la’ær hawa riñ mynsien wei hawa pynhiar mynsien.
