Jowai: Ki ar tylli ki seiñ kamai kari kiwa kynthup ya ka Jowai Ladrymbai Khliehriat Tourist Taxi Association wa ka Jowai Mowkaiaw Mowtyrchiah Laskeiñ Association da pynsñiaw ki yei mynsien wa sñiawsih hadien wym chah ya ki wow pynyieñ kari ki ha ka Stand wa em ha Yaawthymme, Ladthadlaboh, Jowai.
Da pyntip kini ki ar seiñ wa ynnin i step ka 3 tarik da booh ya ka No Parking heithaw wa jooh pynyieñ kari ki, neibhah da pynyieñ kari ki heini kattu la kamwa 6-7 snem, wei hadien wa booh ya kani ka No Parking kiwa kitkaam kini ki ar seiñ da yachem ki ya u SP kamjooh ya u DC ka District wei da chah biang u pynyieñ kari ki heini, tangwa ynne i step da booh biang ki pulit pyllai kari ya kani ka No Parking.
I daw wa da leh kamni toh wym em u su ki ar seiñ ya ka bai Donation wa T. 1,000 cha ka Jowai Traffic Police.
U president ka Jowai Ladrymbai Khliehriat Tourist Taxi Association u Lang Dkhar wa u president ka Jowai Mowkaiaw Mowtyrchiah Laskeiñ Association u Biang Hadem ynne ka sngi hawa yaklam wa kiwa pathai khubor da ong ki wa hadien wa pynman ya ka pynkhooid yaaw ha ka 28 tarik da paan yarap donation ka Jowai Traffic Police neibhah wa da pynlut hawa e baam cha ki khynnah skur.
Neiliang u Dkhar da pyntip u wa ha ka 2 tarik da lai yachem ki ya u Incharge ka Jowai Traffic Police u DH Pde wei handien wa e ki T. 500 ha oo, ya kawa kyntait u wei da paan u T. 1,000 na ki. Da ong u Dkhar wa kam ka seiñ kawa kamai kajiak chi sngi, wei katni wa hiar ka yaaw ymye ki u su ya katæ kawa paan ka JTP.
Hadien wa ym ye ki u e yarap ya katæ ka poisa wa paan ka JTP ynnin i step da booh noh ya ka No Parking ha i thaw wa jooh pynyieñ kari ki.
Kamtæ kini ki ar seiñ da ong ki wa ha iwon iwon i kaam wa bha ki smat ki u embynta lang wa kawon kawon ka seiñ namo ki tnat sorkar wei da kyntu leh ya ki pulit wow sñiawthooh yei eh i khoo wa yachem ki ha kam kini ki por.
Also Read: Chirup wa ki khynnah skur pynkhooid ka JTP ya ka Yaawthymme ha Jowai
Discussion about this post