I em ka khlam COVID-19 ym em ye ko wow tympleh yei mynsien lehkmen Christmas heiwa ha chnong Jowai da man ko kawa lai bait nadooh i pynriam yaka chong ka thaw kamwa jooh leh man-u-snem heiwa ha uni u snem leh i pynkhreh da sdang ki da ki tayaw chwa.
I pynriam ya ki khrik-khraw, i booh khloor wa kiwi kiwa pynphooh pynphieñ yaka Christmas da pynyieñ da pynche ko yaka chnong kylleiñ kyllieñ nadooh ki luti syngkieñ, ki yung mane kamjooh ki yung ki bru.
Ha uni u snem ym ye wow ong toh iwa duna i pynriam hawa nujor wa kiwi ki snem neibhah ki paidbah da ya mih yong lang ki kamwa jooh ha kiwi ki snem.
Ka lehkmen Christmas ha uni u snem ha-o da man ko kawa phær na kiwi ki snem heiwa da pynkrehkaam ka sorkar ya kiwa boon ki kyndon yow yada nei poor ka khlam tangwa heijooh i por da jan man hi ko kamwa jooh deiwa da chah wow wai ka yaw ka haat, iwa hawa sdang u snem waroh hi da pyrkhat cheiwon u poi i rukom im kamwa jooh kamwa nachwa heiwa ynne hadooh ka Night Curfew leh da pyndam yaka yow yoh ki paidbah wow lehkmen Christmas.
Kamwa da sakhi ynne ka sngi, ka yaw ka haat man ko kawa dap wei i mih i lai i paidbah leh man ko kawa laitlooid, i yachem lok wei i ya e khublei Christmas da sakhi cha wah chaneiñ deiwa wyrchaw ya ki kti ym de deiwa ya khublei ya kdung kamwa jooh.
Ini waroh ye wow ong wa kani ka Christmas toh ka wow sahkynmoo ym du cha i kamjooh ha kylleiñ ki thaw ka pyrthai wa lehkmen ya ka.
Neiliang waroh kiwa em ha u Wyrta leh chim i ya kani ka kabu wow e khublei Christmas wa suk wa kmen ya phi waroh.
