U pa yong ka khyllood kawa da khlaad noh ha Rajasthan, u Ruby Binong uwa da lai wow chimkti yei met yong ka khon na katai ka jylla, da pynsñiaw u wa ym ye ngait u wa ka khon yong oo u pynyap ko pyn ya idæ, neibhah ka toh ka kynthai kawa chlur. Da ong u wa ka khon yong oo man ko leh kawa em sap wei ye u man wa i yap yong ka toh neidaw i bichni kiwi.
Yei met yong kani ka khyllood wa da khlaad ha Rajasthan da pynpoi noh ynnin ka sngi cha ka chnong wa ka chong sah ko ha Marngar, Ri Bhoi District. Heipor wa da wanrah yei met yong ka, da sawa i yaam bru wa i piah dohnood kiwa ha-yunng ha-sem wa na ka chnong Marngar hi waroh kawi.
Ka Walinda Binong, da suba wa chah pynyap ko hapoh ka kamra sah yong ka, ha Girls Hostel yong ka Mody University kawa em ha Lakshammgarh yong ka Sikar District ka jylla Rajasthan ha ka 27-04-23.
Ya i met yong ka da lai chimkti da u pa ko, u Ruby Binong deilang kiwa ha-yung wei deiwa synraaan lang ki bor pulit ka Meghalaya hadooh wa poi ha Nongagang Marngar, Ri-Bhoi District.
Hachwa wa yei met yong ka u rah chapoh yung, neiliang kiwa yahkhmat ka thaaiñ Marngar da pynman ki leh yei lehniam lehrukom katkam ka dustur Khasi wow kñia wow khriam neidaw wa toh wa yap mynsoo lane kawa suba chah pynyap. Ya ka lehniam wa khaddooh daw pyndep myntu ka sngi deiwa thang katkam ka dustur Khasi hapoh ka thaw thang bru yong ka thaaiñ Marngar.
