Ka Shillong Press Club (SPC) deilang ka Meghalaya Editors & Publishers Association (MEPA) hadien wa chong yalang ki ha Shillong Press Club ha ka 4 tarik, da pynsñiaw ki yei sñiaw khyrngiat wei ym ye pdiang yeiwa booh namo ka Social Media Post yong ka VPP Youth Wing deiwa khut pynman da ka Rally thuk-thuk ha ka 6 tarik uni u bnai yow pyrchah yow uwi na uwa soi pyrtuid ya ka chithi wa dawa paan maap na u VPP President, u Ardent Basaiawmoit hajrong i pynbaad u ya ki ar tylli ki laad pathai khubor kitæ ka Batesi TV wa ka T7 deiwa ong wa pynmih khubor thok ki namo ka Fake News.
Da ong u wa uwa soi pyrtuid neibynta ka MEPA man u leh kam u Vice President ka Association, u Rajiv Choudhury wei da kreh u kam uwa thoh khubor ha Meghalaya la palat 30 snem wei ha iwon iwon i rukom ym ye wow khut ya oo kam u “Mynder” kamwa da ong ka VPP Youth Wing.
Chooh chooh da ong wa kiwa thoh khubor toh kiwa yatylli wei ymtoh kiwa pait chiliang leh chiliang deiwa kheiñ yei jaitbru næ wow yoobeiñ yoopoh ya kiwi deiwa kheiñ ya ka jaitbru wei ki kreh ki kam u chrot wa soo ka synchaar paidbah.
Kamtæ da ong wow pynemkaam kam ini i jiat ktien wa yoobeiñ jaitbru khamtam ya u dkhot wa da heh da san kiwa thoh khubor uwa da tipmit leh da ka State Directorate of Information and Public Relations toh iwa bakla neibhah kammon u kheiñ ya oo kam uwa na baar hawa man u kam uwa chong chnong ka India næ ka VPP kheiñ ko ya ki nong India wa em ha Meghalaya kam ki baar ri.
Da pynkut deiwa ong wa kiwa pathai khubor da kreh ki wow pynmih ya ka khubor wa biang wa tikna khlem da tieñ khlem da pynroh ya kawon kawon ka Political Party.
Discussion about this post