Ka mukotduma PIL heiyatoh wa i dooh bordiñ hapoh ka jylla wa yaleh da u Flaming B. Marak da chong bichaar biang ya ka ynne ka sngi da ka Meghalaya High Court heiwa ka sorkar jylla da e jubab ko tangwa ym em da khana lut ko ya waroh i long i man.
Ka sorkar nadooh wa sdang kani ka mukotduma da e jubab ko i jooh bait deiwa ong wa duna slap iwa da wanrah yei duna um ha Umiam, kamtæ ym ye wow pynmih bordiñ katkam wa emkaam wei mar ya joor u slap ini waroh i eh daw wiar i.
Da dep jubab leh wa ka jylla emkaam ko 200 Mega Unit chi sngi tangwa iwa ye u pynyoh toh du 88 Mega Unit chi sngi tangwa hanla kamni leh, ym em pyndooh bordiñ kam ha ki Hospital wa kiwi ki thaw wym hoi u dooh bordiñ.
Ka yung bichaar da ong ko wa ym ye u pdiang wa i duna i pynmih bordiñ da man ko palat 50% wei ye u man nei duna slap næ na kiwi ki daw tangwa i duna ym toh u man ko 10% na iwa emkaam ki bru-man-ka-sngi. Wei ini duna kattæ toh iwa 50 hadooh 60% iwa daw pynkut lut ya waroh i khih i khan ki bru khlem da yoh bordiñ.
Kamtæ da phah ya ka sorkar wow e jubab ko deiwa bniah heiyatoh wa kawi pa kawi ka District wei kammon da leh ko wow thied bordiñ na ka National Grid wa kiwi de yow pyndap ya ini wa duna.
Heiyatoh won wa ki por wa daw wan, da phah ya ka sorkar wow chna ya ki Hydroelectric Dam wa khian næ kiwon kiwon ki laad wa ye u pynmih bordiñ ki wym syad dor neibhah ka jylla toh kawa yoh chiboon u slap wei kawa em leh boon ki loom yow ye ki jar jiar ki thaaiñ u yoh da ka yong ki hi ka bordiñ.
Kamtæ da ong wa emkaam wow pyrkhat 10-20 snem chakhmat neibhah iwa emkaam toh u pyndap yei ku i pynemkaam bordiñ wei hap leh wow pyrkhat kammon u thied bordiñ yow lait u duna iwa ye wow saam bordiñ.
Ya kani ka mukotduma u chong bichaar biang ha ka 25-07-23.
