U Montri wa pait ya ka chnat Veterinary ka jylla, u Alexander Laloo Hek da ong u wa ka hukum wow khang wanrah ya ki dakha na baar ka jylla toh i kaamram yong ka sorkar, ymtoh wow pynbna da kamwi da ki District.
Hawa klam ynne ka sngi, u Hek da ong u wa i khang ya ka dakha lane ya kiwon kiwon ki doh na baar jylla toh wow leh leh hi da ka sorkar, ym da ki bor District neibhah ini man ko ka rukom krehkaam namo ka Policy ka sorkar.
Hawa yatoh wa i khang wanrah dakha na baar jylla kamwa da pynbna da ka Commissioner ka Food Safety, u AL Hek da ong wa iwa emkaam toh ya ka chnat Fishery wa toh u pyntip chwa cha ka sorkar hajrong i chem yei dawai Formalin ha ki dakha, hadien itæ ka sorkar daw rai ko wow leh yeiwa emkaam, lada toh u khang næ ym emkaam yei wanrah dakha na baar.
Da ong u wa ymye wow khang du ha kawi ka District ya kiwon kiwon ki marbaam, tangwa iwa wow leh toh du ka sorkar.
Kam wow pynkynmoo wa ka Commissioner ka Food Safety, da khang ko wow wanrah dakha hadooh 15 sngi nadooh ka 8 tarik uni u bnai hadien wa ka Test wa da leh da pynyoo ko wa da em i dawai Formalin ha ki dakha, iwa da booh hei maa yei chait i khiah ki paidbah.
