Ka MLA na Saipung-Sutnga, ka Santa Mary Shylla da ong ko wym ye u man wa ya ka poisa neibynta wow chna pynbha ya u sarok NH-6 na Jowai cha Ratacherra wa da pynbna Rs. 290 klur toh kawa da e hadien chi sngi wa lai e chithi u MP ka Shillong, u Ricky A J Syngkon cha u Montri ka chnat Ministry of Roads Transport and Highways, u Nitin Gadkari.
Yeini da ong ko ynne ka sngi hadien wa mih ha kawi ka kot khubor wa da yoh ya katai mang poisa kawa Rs. 290 klur du hadien chi sngi wa u MP ka VPP na Shillong da lai yachem u wa u Gadkari.
Hawa klam wa kiwa thoh khubor ynne, ka Santa da khana ko wa ka mang poisa neibynta u sarok Jowai-Ratacherra man ko Rs. 200.81 klur, wei da yoh ha u Naichiphaw 2023, wei kattæ neiliang ka sorkar jylla da phah ko wow kreh yei kaam nadooh u Wisu (Mar) uni u snem.
Da khana ko wa hadien wa da yoh ya ka Rs. 200 klur tam, u Montri Rangbah, u Conrad K Sangma da lai biang u cha Delhi yow paan chooh chooh ya ka poisa kawa man Rs. 89.90 klur wei neibynta kani ka mang poisa, i kaam da lai bha i.
Hajrong i kam wa i yoh ya ka Rs. 290 klur toh neidaw u MP ka VPP, neiliang ka MLA da ong ko wa sñiawkmen ko wa lada yoh chooh chooh sa katæ ka Rs. 290 klur nei chimkhia u MP, wei da bynrap ko deiwa ong wym ye u man wa yoh ya ka mang poisa du hapoh chi miet.
Discussion about this post