Ynnin ka sngi ka sorkar jylla lyngba ka chnat PWD da pynmih ko ya ka hukum wow kyrriah noh ya ka yung krehkaam ka PWD (Roads), North Jowai Division na Jowai cha Shangpung wei wow pynkylla noh leh yei pyrtuid yong ka kam ka Shangpung Division.
Heiyatoh wa ini neiliang u MDC ka Congress na Jowai Central, u Andrew Shullai da ong u wa ini i leh ka sorkar toh iwa da pynsñiawsih wei iwa man pyrchah ya ki paidbah.
Da ong u wa ini iwa dep da yoo wa u MLA ka Jowai leh da pyrchah u yeini i thmu tangwa kat u yoo won u MLA da klam u deiwi katwa i kaam won deiwi wei ini i leh arsap yong oo man i iwa ym ye u pdiang.
U Shullai da ong u wa ka sorkar toh u pynku kyrdan ko ya kani ka Sub-Division tangwa neiyi i daw wa da rah da kawa da em ha Jowai neibhah wa em boon ki sarok kiwa ym toh luti ya ki paidbah wow lai ki chadooh Shangpung kam ka Nongjngi, Kyndongtuber wa kiwi kiwi wei ymtip lada ka yung krehkaam ha Shangpung da man ko kawa biang namo kawa ympu biang.
Da kylli u wa lada i kyrriah ya kani ka yung krehkaam ym ktah i ya i kreh ha kani ka yung krehkaam neibhah daw emkaam wow em kiwi ki yung krehkaam kam ka Treasury Office khnang wow ye u wanrah yei kreh iwa khlem thut.
Chooh chooh da ong u wa i em ka yung krehkaaam ha Jowai daw pynsuk ko ya ki Contractor neibhah du ha Jowai daw ye ki wow pyndep yei kaam yong ki (kam ha Jowai South, Central Division wa kiwi kiwi).
Heijooh i por da kdaw u wa i em kani ka yung krehkaam ha Jowai toh iwa da slem wei kiwa kreh boon hi toh kiwa da sah ha Jowai wei da chna yung chna sem wei da sah ki pyn ha Jowai tangwa kattu won da haap lai kreh kki chadoooh cha Shangpung.
U Shullai da ong u leh wa man i iwa sñiawsih wow yoo wa da dooh yeiwa jooh em ha Jowai heithaw wow pynneh ya ka.
