U Montri ka chnat Community & Rural Development, u Hamletson Dohling da pynman u ya ka yalang wow boodien waka State Rural Employment Society, (SRES) kawa pait yei pynkrehkam ya ki Scheme ka sorkar pyrdi kam ka MGNREGA, PMAY-G, RGSA wa CFP ynnin ka sngi ha Main Secretariat, Shillong.
Ha kani ka yalang da yaklam yei pynkrehkaam ya ka MGNREGA waka PMAY-G heiwa da emlang u Secretary, C&RD, u T. Lyngwa, IAS, Mission Director, SRES, u Sibhi Chakravarthy Sadhu, IAS deilang waka Joint Mission Director, SRES, ka Iaraphunlin Diengdoh wa kiwi de ki sahep ka SRES.
Da khana ha u Montri yeiwa yatoh waka poisa wa kamjooh i pynkrehkaam ya kini ki artylli ki Scheme. Heiyatoh waka MGNREGA da khana wa em boon ki kreh wym pu pyndep wei yei wym ye kiwa boon ki Block u poi cha ka thong wow pyndep 60% i kreh kiwa em hapoh ka NRM.
Da yaklam leh ya kiwi de wa yatoh wa ki laad wow ujor, i ya krehlang wa kiwi ki chnat kamjooh ya ka Amrit Sarovar.
Neiliang u Montri da ban joor u yei emkaam u pynemkaam ya ka Area Officer App yow ye u booddien yei pynkrehkaam ki Scheme, wei da kylli u leh ya ka poisa wa man ka bhah yong ka jylla wa hap u yoh yow ye u lai bait i pynkrehkaam ya ki Scheme.
Heiyatoh waka PMAY-G Scheme, da pyntip cha u Montri wa da pynkrehkaam da ka PDIA nadooh u Naiynñiaw 2020 kawa hap u embynta lang ki heh ka jylla, ki District wa ki Block hadooh kiwa pynlai chnong yow pynsmat pyndep yei kreh khamtam kitu kiwa dang sah nadooh u snem mang tangka 2016-17. Ini daw pynsuk ko leh yei lai bait ka poisa wa toh u wan naka Ministry of Rural Development cha ka jylla.
Da khana leh ya ki yung wa dang sah ki wym pu dep u chna kamjooh i chem chitom heiyatoh wow yoh thaw ya kitu ki wym em thaw kiwa toh u yoh myntoi na kani ka Scheme, i chem chitom wow yakrehlang wa kiwi ki chnat wa kiwi de wa chem chitom da kiwa boon ki District wa ki Block heiyatoh wow bood ya ki kyndon hapoh ka Awaas+ (Inclusion list) neibynta u snem mang tangka 2021-22.
U Montri da phah u leh ya ka SRES wow e sikai ya kiwa kreh sorkar khamtam ki BDO wa dang thymme kamjooh ki Junior Rural Development Officer yow pynku ya ka jylla.
Da pynwai ya ka yalang deiwa e khublei u Montri ya ka SRES kiwa da ye u lehbha hanla em boon i chem chitom deiwa pynchlur ya ki wow kreh chitom chooh chooh.
