U Montri ki kaam pohyung ka jylla, u Lahkmen Rymbui da kyntait u wa em i tkhoh krehkaam ki pulit wow khoom u kdoh ya ki kaam wymman ka HNLC, deiwa ong wa ki pulit da yohkse ki yeini tangwa ympu em kiwon kiwon ki sakhi wa biang wow leh iwon iwon iwa emkaam.
Hajrong i kam ka HNLC wa emkti ko heini iwa jia, da ong u wa hadooh ynne ympu ye wow pynsakhiat yei kam ka HNLC wei kiwa emkti heini, ka sorkar u kheiñ bait ko ya ki kam ki damok.
Kam wow kdaw heini, ka Hynniewtrep National Liberation Council (HNLC) da kam ko wa emkti ko wow tympdung ya u bomb Improvised Explosive Device (IED) ha i thaw sah ki wakreh ka karkhana Star Cement ha Lumchnong, East Jaiñtia Hills District ha i janmiet ka 12 tarik heiwa da mynsoo 2 ngut ki bru.
Chooh chooh kani ka seiñ da kam ko leh wa emkti ko hei tympdung ya u bomb IED ha Soo-kilo, East Jaiñtia Hills ha ka 27 Khonchonglad.
Hawa klam wa ki laad pathai khubor, u Rymbui da ong u wa kam kini ki jia, pynman ko ya ka chnat pulit wa neini chakhmat wow chimkhia wei kiwon kiwon ki bru kiwa emkti daw pynchitom khnang wa kam kini ym jia de.
Da ong u wa i kam wa i leh yong ka HNLC toh du wow pynyoo pyrthai biang ya idæ, tangwa neiliang ka sorkar jylla wei kamjooh ka sorkar pyrdi ym e laad ko ya kam kini ki jait kaam.
Heijooh i por u Lahkmen da ong u wa kam u montri da chimkhia u ya i tyrwa yasuk ka HNLC, tangwa ympu che iyi kwah kani ka seiñ.
Da pynrap u leh wa i klam ymtoh u wan i du dei maham pyntieñ.
