Ka mukotduma PIL wa da yaleh da u Kynjaimon Amse heiyatoh wa u sarokbah NH-06 da chong bichaar biang ka ynne ka sngi heiwa ka sorkar jylla kamjooh ka National Highways Authority of India (NHAI) da e jubab ki heiyatoh wa u sarok NH-06 deiwa kheiñ nadooh u Jowai Bypass hadooh Ratacherra.
Ka Meghalaya High Court da ong ko deiwa yoo yei mih khubor kamjooh ki dur ha kini ki sngi yei rukom man u sarok Jowai Bypass hanla i pynchna toh iwa da pyndep da ka chnat PWD (Roads) da pynyoo wa ini i pynchna ya uni u sarok ym em neh i tang ar sngi leh.
Ka yung bichaar pdiang ko wa i psiang toh iwa ye u khloh manda slap tangwa ini waroh da jia i chwa wow poi i por lyiur kamtæ ym ye wow e daw wa sih uni u sarok toh neidaw wa joor u slap wei manda pynchna ya u sarok toh u pyrkhat mynnu i samoi wa hiar u slap.
Ka NHAI won da ong ko wa em ki bynta na Jowai chadooh Khliehriat kiwa dang emkaam wow pynchna wei ha ki bynta ka Sonapur Tunnel leh emkaam wow pynchna wei daw e noh ya ka Contract yow pyndep yei kreh chwa u kut u Naiynñiaw 2023.
Ka yung bichaar da ban joor ko wa i kreh toh u pyndep chwa u joor u slap wei da slem ware i por wow yooluti u pyndep yei kreh hapoh kini ki tayaaw wow wan, kamtæ da phah ya ka NHAI wow chimkhia hawa pynchna ya u sarok heipor wa slap yow lait u chah rong u sarok.
Da phah ya ka NHAI wei kamjooh leh ya ka sorkar jylla wow pyntip ki kammon da lai i kreh chakhmat chwa wow chong bichaar biang ya kani ka mukotduma.
Neiliang uwa yaleh mukotduma da kdaw u leh wa da em boon i oor khyndaw ha kini ki bnai wa da dep ha ki bynta ka Malidor hadooh Ratacherra wei ya ini leh ym em chimkhia. Kamtæ ka yung bichaar da ong ko wa ka NHAI toh u chimkhia ko yeini wow pynkhooid ya i khyndaw wa oor neibhah uni u sarok toh uwa emkaam bha wei emkaam leh u man u uwa hoi u pynemkaam waroh chi snem.
Ya kani ka mukotduma daw chong bichaar biang ha ka 21 tarik uni u bnai.
