U Montri wa pait ya ka chnat i chait i khiah ha ka jylla, u James PK Sangma da ong wa ka chnat da booh ko ya ki kyndon yada COVID-19 ha i por wa pynlai ya ki tamasa, wei hadien wa da booh ya ki kyndon ka chnat ym ye ko wow lai pait markhmat wei wow rah ya ki bru kiwa tyngkheiñ kyndon.
Da ong wa man iwa emkaam ya ki paidbah wow sñiawthooh wa hanla da em i hiar wei duna kiwa yabi ya u khñiang khlam, tangwa ym toh wow chim stiñ, toh u man hi kiwa syndong neibhah ym man wow em ka Lockdown kawa ktah yei im wa man-ka-sngi.
Hawa yatoh wa i chem ya u jiat thymme u COVID-19 uwa tip kam u Omicron ha kiwi ki ri ka pyrthai, neiliang u Montri da ong wa ka sorkar ka da pait bniah bha wa ka jylla ym chah ktah ko, heiwa da pyntip wa hadooh katni ka jylla Meghalaya ym pu em chah ktah ko ha u Omicron.
