Ka mukotduma PIL wa da yaleh ha Meghalaya High Court heiyatoh wa i phah ka sorkar wow pynbiang Aadhaar ya kiwa yaleh ya ka Post Matric Scholarship neibynta ki SC/ST kamjooh kiwi ki yarap poisa neibynta ki SC/ST kiwa lai puræ ki wym ye u yoh Scholarship, da chong bichaar ka da u Justice I.P. Mukerji, Chief Justice wa u Justice W. Diengdoh, Judge ynnin ka sngi.
Neiliang u muktiar kiwa yaleh PIL da ong u wa da em chwa ar tylli ki hukum wa da pynmih da ka Supreme Court kawi ha u 2015 wa kawi won ha ka 2019 heiyatoh wa ini deiwa kdaw u ya ka Section 7 ka Aadhaar (Targeted Delivery of Financial and other Subsidies, Benefits and Services) Act, 2016, wa iwa pynbna (Notification) wa da pynmih da ka sorkar jylla ha ka 31-10-23 kawa da ong wa kitu ki khynnah wa lai puræ kiwa kwah yoh ya ka Fees Compensation wa da e hapoh ka Post Matric Scholarship for SC/ST Students (Free Studentship) næ ka yarap poisa neibynta kitu ki SC/ST ki wym em hok wow yoh Scholarship, da emkaam ki wow em ya u Aadhaar Number.
Kamtæ da ong wa katkam ka hukum wa dadep pynmih, ka jylla ym ye ko wow pynbor yei emkaam Aadhaar.
Ka High Court da ong ko wa kani ka aiñ u Aadhaar toh kawa da klam neibynta i yoh myntoi kiwa chong chnong ka ri India lyngba ka Consolidated Fund of India næ lyngba ka Consolidated Fund of the State wei kani ka aiñ da ong ko leh wa kitu kiwa em hok u yoh myntoi lada ym em Aadhaar ki, toh u e laad ya ki wow pynemkaam da kiwi ki kot ki sla wow pynsakhiat yei long i man ki kam kiwa chong chnong.
Kamwa man kattæ da ong wa i wym em ya u Aadhaar ym em mut wow pyndooh yei hok ki bru.
Heiyatoh won wa ka Notification wa da pynmih da ka sorkar ha ka 31-10-23, da ong wa ka sorkar jylla em ko yei hok wow paan ya u Aadhaar na ki bru yow smat u tipmit ki tangwa kitu ki wym em Aadhaar næ ki wym bien u leh Aadhaar ye ki wow wanrah da kiwi ki kot ki sla kam ka PAN Card, Voter Card, Passport wa kiwi de kiwa ye wow pynhun ya iwa emkaam ki bor sorkar wei ym ye wow chah pyndooh yei hok lada ym em Aadhaar Card.
Discussion about this post