Ka seiñ Meghalaya Rural Tourism Forum (MRTF) da e yumut ko cha u Montri ka chnat Tourism, u Paul Lyngdoh, wa ym ye u wanrah yei rukom pynkrehkaam ka jylla Sikkim ha Meghalaya hawa yatoh wa ki kari kamai wa kit ya kiwa uiñke suwari.
Ha ka dorkhat wa e cha u Montri, neiliang u Alan West Kharkongor da ong u wa ka MRTF da pynsñiaw ko ya ka luti wa da chim da ka All Meghalaya Khasi Tourist Taxies Association (AMKTTA) wow khang ya ki kari na Assam wow wan kit ya kiwa uiñke suwari chadooh ki Tourist Spot toh ka wym biang neibhah wa ka riti synchaar ka ri da klam che wa kiwa chong chnong ka India ye ki wow lai laitlooid hapooh u pood u ang ka ri, wei sa kawi leh ka jylla Meghalaya em ko ka luti wa lai lyngba cha kiwi ka jylla.
Da ong u leh wa ka jylla Sikkim ka phær ko na ka jylla Meghalaya, neibhah wa ka man ko ka jylla chong sier bha neiwa em ko ha khappood wa kiwi ki ri wei rap phær i man i rukom kær ki loom.
Heijooh i por da ong u wa lada wanrah yei rukom pynkrehkaam ka Sikkim ha Meghalaya, ka sorkar jylla daw emkaam por ko wow piat hadooh katwon wa ye u leh cha i.
Da pyntip u leh wa i yaklam pynbait yei eh da leh ha ka Committee wa da thung ka sorkar kawa emlang wa ki seiñ kiwa kamai kari wa kiwi kiwi.
Discussion about this post