Shillong: Ka sorkar jylla daw rai ko lada u thung ko ya u General Secretary (GS) warim ka Hynñiewtrep National Liberation Council (HNLC), u Cherishsterfield Thangkhiew wow man u kam u ksiang wow yaklam wa kiwi ki dkhot ka seiñ.
Kam wow kdaw heini ka HNLC lyngba u Acting General Secretary wa thymme yong ka, u Saiñkupar Nongtraw da pynlait khubor u wa ka seiñ u pdiang ko ya u Thangkiew kam u ksiang wa ka sorkar, tangwa neiliang u Symbood Montri Rangbah ka jylla, u Prestone Tynsong ynne ka sngi da ong u wa hadooh katni ka sorkar ympu em yaklam ko yeini.
“Emkaam wow chong pyrkhat yillu bha hajrong ini, wei katni u Montri Rangbah wa u Montri ka kaam pohyung ka jylla em ki cha baar, tangwa mar ya wan ki daw lai yachem O wa ki hajrong kammon u leh yeini i kaam neini chakhmat”, da ong u Prestone.
Da ong u wa ka sorkar thrang ko wa waroh ki dkhot ka HNLC u ieh noh ki yei kaam kieñ suloi wei wow uiñ biang cha ka luti wa yah u Thangkiew.
Heijooh i por u Prestone da ong u wa i klam u Thangkiew wa wan chong ngiah u wa da wan pyndem pynyoo i wa kwah u wow wan noh cha ka rukom im thymme.
“Chong i ha phi lada kheiñ phi wow chongngiah u namo wa wan pyndem u, tangwa ka sorkar chim ko wa da ieh u ya ka luti warim wei da jied u ya ka luti wa thymme, wei iwa kongsan dooh toh wa da rai u wow wan cha ka luti wa thymme,” da ong Prestone.
Hajrong i pynbaad ka heh ka Congress, ka Ampareen Lyngdoh kawa ong wa i pyndem u Thangkiew da klam che i wa ki paidbah phylla ki wa boi em iwon iwon neibhah wa kwah ki u tip kayi ka kyndon wa yakut hapyrdi ka sorkar wa oo. Hajrong ini u Prestone da ong u wa i klam ka Ampareen toh i klam khlem yurim wa i klam khynnah deiwa e nongmuna ya ki por wa wan pyndem u Chairman ka HNLC, heipor wa man Montri Rangbah, u Dr. DD Lapang heiwa da pdiang sñiawbha ya u Julius K Dorphang.
U Symbood Montri Rangbah da kyntait u wa ka sorkar MDA da booh kyndon ko hajrong i wan pyndem u GS warim ka HNLC.
Discussion about this post