I yachem ki ar ngut ki Montri Rangbah ka jylla Meghalaya wa Assam, u Conrad K Sangma wa u Himanta Biswa Sarma ynnne ka 12 tarik ym pu em ye wow chim ya iwon iwon i rai wow pynbait ya u pood u ang hapyrdi ki ar jylla, tangwa i yachem wa da man ynne ka sngi ha Guwahati da rai wow pynjlan biang cha ka yalang wa daw pynman hachwa ka 21 tarik uni u bnai.
Hawa klam hadien ka yalang, u Symbood Montri Rangbah ka jylla Meghalaya, u Prestone Tynsong da pyntip u wa ka yalang da man ko kawa mihsoh wei da poi ko cha ka bynta wa khaddooh, tangwa iwa emkaam won toh sa kawi ka yalang yong waroh ar tylli ki sorkar jylla. Da ong u wa waroh ar jylla daw bichaar bniah chwa ki ya ki Report yong waroh ar tylli ki sorkar wei ym slem de daw chong biang ki ya ka yalang. Da pyntip u wa kamwa da rai, kani ka yachem toh wow yaklam bait chwa ya ki 6 tylli ki thaw wa ya kajia ha khappood wa da booh ha ka bynta wa nyngkong.
U Prestone da pyntip u wa ki ar jylla da jan poi ki chadooh cha ka soskular wow ya pynbait noh, ha kawa ki Montri Rangbah da paan ki ya ka Report wa che na waroh ki Regional Committee wei hadien itæ daw yachem leh ya u Union Home Minister, wei neiliang ka Meghalaya da pynsñiaw ko ya i kyrmen wow ye u pynbait noh hachwa wa ka jylla u lehkmen ko yei dap 50 snem kawa mut chwa ya ka 21 tarik uni u bnai.
Kam wow pynkynmoo wa ha i yachem wa khaddooh kawa da man ha ka 15-12-21, ki ar ngut ki Montri Rangbah deiwa emlang ki Montri sorkar da chim rai ki wow pynbait noh ya i bynta wa nyngkong ha lane chwa ka 15 tarik uni u bnai neibynta ki 6 tylli ki thaw wa em ya kajia wei kiwa rap suk u pynbait na ki 12 tylli ki thaw ha khappood wa kynthup ya ka Tarabari, Gizang Reserve Forest, Hahim, Boklapara, Pilangkata Khanapara wa ka Ratacherra.
