U Symbood Montri Rangbah ka jylla, u Prestone Tynsong da ong u wa ympu ye wow pynmih paidbah ya ka bui takit heiyatoh wa i chah siat yap u heh warim ka HNLC, u Cherish Starfield Thangkhiew, iwa da jia ha ka 13 Naisaphra 2021.
Ka sorkar da thung ko ya ka takit wa samen da u Rtd. Justice T Vaiphei hadien wa da mih i dawa na kiwa boon ki seiñ, wei neiliang u Vaiphei da ekti u ya ka bui takit ha u Montri Rangbah ka jylla ha ka 20 Naisan uni u snem. Hadien ini kiwa hayung wa ka Seng Samla Mawlai Pyllun da dawa ki wow pynmih paidbah noh ya kani ka bui takit.
Hawa kylli hajrong ini i dawa, u Prestone da ong u wa ya ka takit næ ka Enquiry Commission em ki jar jiar ki kyndon, wei ymye wow pynmih næ pynbna paidbah bait ya ka bui neibhah haap wanrah chwa ya ka ha Yung Dorbar Chna Aiñ.
Da ong u wa ki paidbah dawa ki wow pynmih ya kani ka bui takit, tangwa ka sorkar haap pyndep chwa ko yeiwa emkaam katkam ki kyndon hadien wa da thung ya ka takit.
