I wym ye ka sorkar waka Jowai Municipal Board wow pynyoh thaw noh jhep hadooh wa da lang biang i jhep dei yong tayaw ha ki yaw ka chnong Jowai da pynman ya ka seiñ wow ong wa kiwa yahkhmat ym toh de u suki hi-eh wei wow paitke hawa ki paidbah chem chitom ki.
Ka JSU da khut ko leh ya waroh ki paidbah ka Ri-loom Jaiñtia deiwa kyntu leh ya waroh ki para chnong wa em hapoh ka West Jaiñtia Hills wow ya pyrkhat wei wow ya krehlang wei ymtoh wow em i mynsien sñiawyaphær thaaiñ lane chnong wow wanrah yei khooid i suba hapoh ka Iawmusiang.
Ka seiñ da ong ko wa nadooh ki snem wa dadep da jooh e yumut cha ka sorkar wa yaka Jowai Municipal Board wow chimkhia yei thaw wa noh jhep ha Mynkjai wei ka seiñ da ong ko wa ini toh i lehstiñ ka Municipal Board waka sorkar wa da jia hadooh katni u pood ya ki paidbah wa kiwa chong yaw u chem jinjar wow yoh thaw neh jhep.
U President ka seiñ u Jersom Shylla da ong u wa ka sorkar toh u thooh ko ya ka thaw wa paka yow noh jhep deiwa pynemkaam da ka stat ka juk wa ktani yow ye u leh ya ka Scientific Waste Management deiwa ong leh wa chwa wow noh yei jhep cha kini ki thaw ka sorkar toh u yoh chwa yei pdiang na ki chnong wa marjan wa i thaw wa da jied yow noh jhep.
Neiliang won u General Secretary ka seiñ, u Treibor Suchen da ong u wa ya iwa dadep ym ye de u ong iyi iyi leh tangwa hap wow pyrkhat thymme yow yoh thaw wa biang yow wanrah biang yei khooid ha Iawmusiang sa chisien deiwa ya krehlang kiwa synchaar chnong, ki paidbah wa kiwa mihkhmat ka Ri-Loom Jaiñtia.
