Ynne ka sngi da wan wai ya ka District and Sessions Court Complex ka East Jaiñtia Hills da u Chief Justice ka Meghalaya High Court, u Justice Sanjib Banerjee hei emlang ki Judge ka High Court, u Justice HS Thangkiew, u Justice W. Diengdoh, u Montri ka chnat aiñ ka jylla, u James K Sangma wa kiwi kiwi.
Ya ini i yung da pynlait poisa ha ka 25 Wisu 2019 ha i lut wa T. 14.38 klur wei da pyndep ha u Naisan yong uni u snem.
U Justice HS Thangkiew hawa e i klam da ong u wa kattu deiwa em kani ka yung thymme daw ye u e i chakri bha ya ki paidbah wei ini i yung ymye i wow man khlem i yakrehlang ka sorkar, ka High Court wa ki Contractor. Da ong u leh wa katni deiwa em ka Technology da ye bha u e i bichaar ya ki paidbah wei toh i kaamram ka Court wow e i bichaar cha waroh khamtam kiwa dooh wa duk.
U James Sangma da ong u wa da em u ar snem nachwa heini wei heitæ i por da phiah ya i kaam bichaar wa i synchaar wei dap u dei kmen wow sakhi wa da yoh ko ya i yung wa pura. Da ong u deiwa sdang ya ka District and Sessions Court Complex ha East Jaiñtia Hills da ye wow wanrah yei kaam bichaar chajan ki paidbah. Da pyntip u leh wa daw chna ya ka National Law College katkam wa angnood u Chief Justice.
U Justice Sanjib Banerjee da e khublei u ya waroh ki paidbah ka District wa da yoh ya kani ka yung bichaar wa pura. Da ong u wa u mooyurim (Plaque) ymtoh wow em u ya i dur wa i pyrtuid neibhah ini toh i kaamram ya ki paidbah. Da ong u wa boonsien i kaamram wan i nei chaniah deiwa e khublei ya ka sorkar wa da ye wow chna pyndep ya ini i yung du hapoh ar snem.
Da ong u wa ka sorkar da e ko ya ini i yung, wei toh i kaamram yong i wow pynemkaam hok ya ini i yung.
Chooh chooh da ong u wa ka Yung Bichaar toh wow e yei hok cha kiwa toh u yoh yei hok. Heiyatoh wa ki mukotduma wa sahteiñ, da ong u toh kiwa hiar nadooh ki por nachwa wei daw wiar ki kat dang yah i por.
Da ong u wa hapoh chibnai daw sdang ya i sylli ya i duna ha i rukom krehkaam ka High Court da ka dhab kawa laitlooid wei iwa chem na i sylli daw booh wow yoo ki paidbah heiwa ini daw man i kam ka nongmuna ya ka ri waroh kawi.
Ya kani ka sngi da pynphooh da ki rwai wa ki chaad na ki khynnah skur kamjooh wa na ki muktiar.
