U MDC ka Nongkrem uwa man leh u MLA warim, u Lambor Malngiang da kylli u ya uwa yahkhmat ka Voice of the People Party (VPP), u Ardent M Basaiawmoit uwa da pynbaad wa i mynjur ka sorkar ya ka Inner Line Permit (ILP) toh du wow pynbiej paidbah.
Hawa klam ynne ka sngi, u Lambor da ong u lada u Ardent ong u wa da pynbiej ya ki paidbah deiwa mynjur yei pynkrehkaam ya ka ILP ha ka jylla, ymtoh mo u MLA ka VPP, u Adelbert Nongrum emlang u ha Assembly hawa mynjur ya phang pynkrehkaam ILP.
U Lambor da ong u wa ka yung dorbar da rai lang ko chirup wow dawa ya ka ILP ha u snem 2019, wei da iwi i sur da mynjur wow phah cha ka Ministry of Home Affairs ka sorkar India wei ymtoh kawa phah ke yow pynbiej paidbah.
Da ong u wa kamwa dawa ki seiñbhalang, ki MLA leh da dawa ki ya ka ILP tangwa ka jylla Meghalaya man ko kam ka khyrdop yow lai cha kiwi ki jylla wei kani ka bynta da emkaam wow pyrkhat bha kammon wow pynlai khnang wym em iwon iwon i tkoh.
Da ong u leh wa lada em kiwa ong wa pynbiej hi-eh ya ki paidbah, ha iwon i rukom pynbiej heiwa da lai boonsien cha Delhi yow yachem ya u Montri kaam pohyung ka ri.
Kam wow kdaw heini wa ini wa dep, u President ka VPP, u Ardent M Basaiawmoit da pynbaad u wa i mynjur ka yung dorbar chna aiñ ya ka ILP toh du wow pynbiej ya ki seiñbhalang, wei da ong u wa ka sorkar jylla toh u pyndam noh ko yei pynbna ka President ya ka hukum wow pyndam noh ya ka Khasi-Jaiñtia Hills na ka chatri ka Eastern Bengal Frontier Regulation Act 1873.
Discussion about this post