I Video wa da poor bha kattæ ha WhatsApp wa ha kiwi de ki rynsan Social Media da yoo ya uwi u bru wa klam dei ktien Khasi uwa thaap uwa bok wei maham hadooh wow siat ya uwi uwa kamai Sumo na Sohra cha Shillong.
Ini Video toh iwa da riñ da ka Mobile Phone u Tourist uwa na baar jylla uwa chong hapoh kari Sumo heiwa da yoo wa uwa yah kari da chah thaap chwa u ar sien wei da chah maham u leh lada kwah u da ka tiar da ka suloi wei heini i por leh da pteiñ uni uwa yah kari wow chah thaap wei da sñiaw ya uwi uwa klam dei ktien phareng uwa ong, “It’s okay, it’s okay bro” iwa ye u man u bru uwa chong hapoh kari.
Heini i por uwa yah kari da khang u ya ka dwar heiwa uni u bru da pteiñ u wow maham deiwa ong wa da yoh ya u Number kari, heiwa uwa yah kari da ong u wa leh mi kamni ya ki bru paidbah heiwa da chah bok pathan u.
Katkam ka khubor wa da yoh, ini da jia i ha ka 27 tarik uni u bnai ha Shillong wei i thaw wa jia toh ha Rilbong hawa dang wan booh u ya ki Tourist na Sohra cha Shillong.
Heipor wa em ha Rilbong neidaw wa sahkut kari da yaleh u wow lai yow smat u psiah cha Anajee heiwa da chim Pass u ya kawi ka Thar wei heini i por da chah tim u ha kiwa em hapoh kani ka kari kiwa da ong ya oo wow lai jar jiar ka liang.
Hadien won da wan ki ha ka kari u wei oo leh da hiar heiwa da yoo wa em ki ar ngut wei uwi na ki da ong u wa lada kwah u da kani heiwa da pynyoo u da ka Pistol, kamtæ uni uwa kamai kari da psiah biang u chapoh kari.
Hawa pynche yeini wa jia, neiliang u SP ka East Khasi Hills da ong u wa uni u bru wa tba kti ya uni uwa kamai kari ymtoh u pulit tangwa u bru paidbah wei ki pulit da e ki da ka Suo Moto Case wei ka takit dang lai ko chakhmat.
Discussion about this post