Jowai: Ka Basin Development Unit West Jaiñtia Hills ynne i step da sdang ko ya ka kynmoo warom ya ka World Environment Day deiwa lai paidbah ki khynnah skur nadooh na Thomas Jones Synod lyngba ka Iawmusiang, Mission Compound, Chutwakhu hadooh wow poi ha District Library, Mynthong.
Ha i por lai paidbah ki khynnah skur da kbai ki chi chyoh ya ki kyntien sneiñ wa emkaam wow yada ya ka Bei Rymaw kamjooh da rah wa ki kot-rben wa thoh wa klam ya kiwa i ki bru ye i u leh wow yada ya ka rymaw.
Manda poi ha District Library ki khynnah da yoh ki u ap na le ngut ki bru chemphang kiwa klam chaphang ka rymaw.
Kawa klam nyngkong ka J. Dkhar, Botany Lecturer na Kiang Nangbah Govt. College da ong ko wa nadooh dang khian toh u pynchlur ya ki khynnah wow sñiaw yajan ki wa ka Bei Rymaw ymtoh u jngai na ka. Toh u booh ki sngi wow lai ke cha ki loom ki wah, wei heipor wa em ha ka ymtoh u pyllut por deiwa chondur selfie toh u pyrchang wow tip chaphang ki dieñ, ki sim ki doh yow sñiawthooh chaphang ka rymaw. Toh u pynjngai kam na ki phone wa kiwi ki wow pynwit heipor wa em wa ka rymaw.
Heijooh i por da ong ko wa ki thaw wa em ki khloo katni dang duna ki wei u bru da pynkylla dur u ya ka da ki chnong ki thaw wa dang boon katwa dang lai ki sngi.
Ka H. Lato, DFO Wildlife, Jowai da klam ko chaphang wow pynneh pynsah ya ki mrad katwa u Dr. C. Pakyntein won da klam u yei emkaam u pynneh pynsah ya ki jhoor ki phlang ki dieñ wa ye u chna dawai kynbat.
Discussion about this post