U Superintendent of Police ka East Khasi Hills, u Sylvester Nongtnger da kyntait u wa em i chah ksoh ka kari u MLA ka VPP na Nongkrem, u Ardent M Basaiawmoit neidaw wa toh ka kari wa biah yit yong.
Katkam wa khana u SP, ha ka 22 tarik u Naisaphra, ki pulit ka Mawlai Police Station da pynman ki yei ksoh kari yow pait ya ki kari wa biah pynyong, wei ha itai i por da wanpoi ka kari u MLA heipor 11:30 i step kawa da chah pynsangeh lang, tangwa mar ya tip wa toh ka kari u MLA, ki pulit ka Mawlai da pynlait noh ki wut-wut.
U SP da khana u wa katkam ka hukum wa da pynmih, ym chah ya kiwon kiwon wow pynyong ya ki yit kari lait noh ki MLA wa ki Minister kiwa ye wow booh kawi ka kari wa da pynyong ya ka yit kari.
Ha ka tayaaw wa khaddooh u bnai wa dadep, u MLA ka VPP da kam u wa da chah ksoh ha ki pulit du neidaw wa chong u ha ka kari wa biah yit yong, heiwa da pynbaad chooh chooh wa ki pulit ksoh ki ya ka kari u MLA katwa ya ka kari kiwa kyrchaan NPP da e laad wow biah yit yong.
U SP da ong u wa katkam wa da phah, kiwa ye wow biah yit yong ya kari toh du ki MLA wa ki Montri sorkar, katwa ya kiwi ym chah.
Hawa klam ynne ka sngi, u SP da ong u wa ki pulit u kynreh ki naphang ya ki kari kiwa biah yit yong wei lada chem ya kiwa leh pyrchah daw pynchitom katkam ka aiñ.
U SP da pyntip u wa nadooh u Naiynñiaw hadooh kattæ da khloh ya ki yit yong yong ki 1700 tylli ki kari wei na kini, 30 tylli toh ki kari sorkar.
Katkam i ong u SP, ki MDC, ki MLA warim ym ye ki wow biah yit yong ya ki kari ki.
Da ong u wa ki bru samen kiwa kwah wow biah yit yong ye ki wow phah cha ka Committee kawa da thung ka sorkar wei kani ka Committee daw rai ko wow chah næ ym chah.
Discussion about this post