Ha ka yalang pyntipmit paidbah ka Voice of the People Party (VPP) ya ki 29 ngut ki kyrtong MDC yong ka cha ka JHADC wa da pynman ynne ka sngi ha Iawmusiang, Jowai. Neiliang u President yong ka, u Ardent Miller Basaiawmoit da pynche haroh u heiyatoh i e Ticket ka VPP ya u MDC wa katni, u Awhai Andrew Shullai uwa daw yakhun na ka Jowai North, deiwa ong u wa i e Ticket ya uni u MDC wa katni toh hadien wa dadep bichaar bniah wei tynjooh leh yei thij i pyrkhat yong oo.
“Kiwa yahkhmat ka VPP sñiawthooh ki wa uni u kyrtong yoo u wa katni emkaam u lai cha ki paidbah du da ka luti ka VPP, wei du da kani donhi ka luti wa khooid wa bait la dang toh ya nga wow chakri paidbah, itæ toh i klam uni u MDC wa katni wa da e tiket ka VPP,” ong u Ardent.
“Ym toh wa e hi-eh khlem da pait bniah namo wa man uwa suk wow yoh yei jop,” da pynrap u Ardent.
Chooh chooh ong u hei lai luti cha ki paidbah ym em uwi wot leh na kiwa yahkhmat ka Party wa ong wow sai kyrtong du da kiwa dang thymme, ym em leh wa ong wym e Ticket ya kiwa da man kam kiwa mihkhmat namo ki Sitting, tangwa hawa ong i wow sai da kiwa Fresh iwa mut da ki bru wa dang biang, dang khooid wei da sai da ki bru wa man kamtæ.
Neibynta kiwi won ki kyrtong VPP leh ong u, kani hi ka jooh ka rukom wa da e Ticket deiwa bichaar bniah nadong chadong.
Ha kani ka sngi u Ardent da pyntip haroh u wa kini ki kyrtong wym ye ki u lai cha ki paidbah dei mon yong ki hi, næ dei sñiawthooh yong ki hi, tangwa toh u rah ki da ki mat saiñ pyrkhat wa ka Party da booh ko.
Discussion about this post