Ynne ka sngi, ka 16 Kmaichonglad man ko ka sngi ya kawa da tip kam ka Vijay Divas wa Swarnim Vijay Varsh neibhah wa man ko ka sngi kawa sah kynmoo ya ka ri India wa ha kani ka sngi ha u snem 1971 ki chipai ka Pakistan da pyndem (Surrender) ki ha ki chipai ka India hadien ka thma 1971 ya kawa da tip leh kam ka Thma Bangla kawa da neh du kamwa 13 sngi donhi (3-16 Kmaichonglad 1971).
Kani ka thma toh kawa da yaleh hapyrdi kini ki ar ri heipor wa pynlaitlooid ya ka ri Bangladesh ya kawa jooh tip kam ka East Pakistan heiwa chwa wow embynta ka India wow pynlaitlooid ya ka Bangladesh da em chwa i kynaad hapyrdi ki heh ka East Pakistan nadooh u snem 1947 wei khamtam i thombor ki chipai ka Pakistan ya ki paidbah ka East Pakistan heiwa da antaad wa kamwa 3 lak tam (ki bru paidbah) da chah tynyap ki ha ki chipai ka Pakistan.
Ka India da sdang ko wow embynta ha kani ka thma toh hadien wa dat bomb syndet ka Pakistan Air Force ya ki thaw ha India ha i janmiet ka 3 tarik ha ki thaaiñ mihsngi ka ri (India) wei hadien ini ha i jooh i janmiet ka montri rangbahdooh ka ri, ka Indira Gandhi da klam ko ha Radio deiwa ong wa ini i dat bomb toh i chah hiar thma ka ri wei da pynbna ko wa da sdang kani ka thma heiwa pyn ha kani ka miet hi ka Indian Air Force da dat bom ko ya ka Pakistan wei heitæ sdang kani ka thma hapyrdi kini ki ar ri.
Ha kani ka thma ki chipai yong kini ki ar ri da yakhun ki ha pyn ar liang ha ka thaaiñ mihsngi (Eastern Front) wa ka thaaiñ sepsngi (Western Front) wei da poi ko chawa kut hadien wa ka Eastern Command yong ka Pakistan da soi ko ya ka soskular pyndem namo Instrument of Surrender ha ka 16 tarik ha nongbah Dhaka wei neitæ sdang ka u tipmit noh ya ka ri Bangladesh.
Ya kani ka Instrument of Surrender neiliang u Commander ka Pakistan Eastern Command u Lieutenant-General A.A.K. Niazi wa neiliang ka India won da soi da u GOC-in-C of Indian Eastern Command u Lieutenant General Jagjit Singh Aurora.
Neiliang ka Pakistan kamwa 90,000 ngut ki chipai yong ka da chah kem ki ha ka Indian Army wei kamwa 12,500 ngut toh ki bru paidbah namo kiwa hayung ki wakreh yong ki chipai. Ha kani ka thma ka India da dooh ko kamwa 3,800 ngut ki chipai katwa ka Pakistan won hadooh palat 9,000 ngut wei da mynsoo won hadooh kamwa 10,000 ngut ki chipai ka India wei kamwa 25,000 ngut ki chipai ka Paklistan.
Ha kani ka thma ki chipai ka Indian Army, Indian Navy wa Indian Air Force da embynta bha ki ha ka heiwa ka yaleh da man ko ym du ha madan tangwa ha suiñ wa ha duriaw hadooh wa poi u pood wa ka Pakistan da pyndem noh ko haphrang ka India ya iwa ye u ong wa ini i pyndem ki chipai ka Pakistan toh iwa kmai dooh nadooh ka Thmabah Wa Ar.
Kam chibynta wow sdang ya i lehkmen wa chisnem nadooh wa dap 50 snem i jop ya kani ka thma ya kawa da tip leh kam ka ‘Swarnim Vijay Varsh’ neiliang u montri rangbahdooh ka ri daw lai booh syntu u ha ka National War Memorial (NWM) ha nongbah New Delhi.
PICS: Twiter – Ministry of Defence, Indian Army, Indian Air Force, Indian Navy.
