Ka 20 Naiynñiaw 1969 man ko ka sngi wow sah khana parom yanom, heiwa man ko ka sien wa nyngkong dooh wa yooh-kjat u bru ha u Bnai.
Ka NASA yong ka ri United States of America da sdang ko ya ka Apollo 11 Mission wow lai cha u bnai nadooh ka 16 tarik hadooh 24 Naiynñiaw 1969 heiwa u Neil Armstrong wa u Buzz Aldrin da yooh-kjat ki ha u Bnai ha ka 20 tarik.
U Neil Armstrong da hiar nyngkong u ha u Bnai na ka Apollo Lunar Module Eagle wei hadien 19 minit da bood won da u Buzz Aldrin wei da neh ki kamwa ar kynta tam ha u bnai wei da khut ki ya i thaw wa hiar ki kam ka Tranquility Base.
Kini ki ar ngut da pyllang ki hadooh 21.5 Kg i khyndaw na u bnai wow rah biang cha pyrthai katwa u Michael Collins won pynhær (Pilot) u ya ka Command Module Columbia hajrong yong ki.
Hadien ini ki ar ngut ki Astronaut da mih won ki da ka Module Eagle na u bnai wow yachem wa u Michael Collins ha ka Module Columbia chwa wow wan hiar ki cha pyrthai ha ka duriawbah Pacific Ocean ha ka 24 tarik.
Ya ka 20 Naiynñiaw da tip leh ya kam ka International Moon Day ha waroh kawi ka pyrthai.
Pic: Twitter
